By E.L. Minell
I
Isang milyong taon mula ngayon.
Isang lalaki, isang binatang iika-ika, ang nagmamadaling
tumakbo salungat sa liwanag ng papalubog na araw. Pinanonood niya ang kanyang
anino at paminsan minsa'y tinatanaw niya ang gawing kalayuan. Siya ay nasa
malawak na disyertong mabato at mabuhangin. Halong pula at kulay abo ang buong
kalupaan. Saan man siya tumingin ay walang maaaninag na kakaiba sa paligid.
Nagkalat rin ang mga maitim na bato sa paligid. Ang lahat ay gawa sa buhangin,
bato, maliliit na burol, mga yungib o kaya'y mga bangin, ngunit kadalasa'y
patag na kalupaan lang na milya-milya ang haba ng natatanaw niya sa bawat
direksyon. Saan man siya dalhin ng kanyang paningin ay walang-hanggang kawalan.
Sa ibang dako naman ay mga nabubuong ulap ng alikabok. Tinatakpan ng hamog na
alikabok ang lahat ng madaanan. Maliban sa huni ng hangin, ang buong paligid ay
napakatahimik, walang senyales ng buhay.
Madungis at may mga punit ang maruming kulay asul na suot
niya-- ang gawa sa makapal na telang pang itaas na may mahabang manggas at
pantalon. Siya ay bumubulong na tila'y kausap ang sarili habang hawak ang
kaliwang siko nito. Tinignan niya at hinipan ng bahagya ang sugat sa siko sa
butas ng manggas ng kanyang damit dahil sa hapding ramdam sa pagkakagasgas
nito. Ang kaniyang mukha'y nababalot ng pagkayamot. Siya'y duguan at pagod na.
Sa may kalayuan, sa dakong hilagang-silangan, natatanaw
niya ang kanyang binansagang "kulisap"-- isang maitim at malaking
bato. Tinawag niya itong kulisap sapagkat sa unang beses niyang nakita ito,
natuwa siya at inakala niyang isa itong kulisap. Siya'y natuwa muli nang makita
ito, ngunit may halong simangot sa kanyang mukha. Sa tagal ng kanyang nilakad,
sa loob ng anim na oras, siya ay nakabalik na at nagmamadali siyang makaabot
dito. Ang kulisap ay kanyang palatandaan dahil sa umpisa'y ito ang kanyang
batayan ng kalayuan, ang unang pinakamalayong lugar na inabot ng kanyang paa.
Ang tinatawag niyang kulisap ay gawa sa pitong pinagpatong patong na
naglalakihang patag na bato, kung saan ang anim na talampakang haba na
pinakamaitim at pinakamalaki ang nasa itaas. Sa malayo ay hugis insekto itong
nakadapo. Mula rito, sa bandang ibaba sa kinatuturukang lambak ay matatanaw sa
kalayuan ang isang munting asul at
berdeng bahay na nakatalikod sa gilid ng maliit na burol na tinapyas ng hangin.
Mga tatlumpung talampakan lang ang nagsisilbing pader na libis ng lilim sa
likuran ng bahay sa bahaging silangan nito, isang paala-ala sa kanyang hindi
niya makikita ang pagsibol ng araw sa umaga mula sa bahay na iyon.
Magkahalong saya at lungkot ang naramdaman niya noong
makita niya ang bahay sa kanyang pagbalik. Halos labinglimang minuto pa ang
kanyang lalakarin bago siya makararating sa bahay na asul. Siya ay umuuwing
hinihingal sa nag-iisang silungang kanyang kinikilala, ang tanging tahanang
alam niya.
Ang bahay na asul ay walang pinto, butas ang bintana,
maalikabok naman ang bubong at maski ang looban nito'y hindi nakatakas sa lakas
ng hangin na may dalang alikabok. May alikabok sa kusina hanggang sa banyo
nito. Pumasok siya rito at walang humpay na pinagpag ang kulay maputlang asul
na ternong damit at pantalon niyang nababalot ng alikabok. Siya ay pagod na
pagod sa paglalakad ng mahabang oras. Binuksan niya ang zipper ng damit niya.
Agad niya itong hinubad. Siya ay may puting sando at puting short na panloob.
Pawisan siya at nananakit ang katawan. Sinuri niyang muli ang madugong siko
niya. Dumiretso siya sa lababo, dahil sa matinding uhaw, uminom siya ng
napakarami gamit ang kamay at naghilamos pagkatapos. Muli, tumingin siya sa
paligid kung may nagbago, umaasa siyang may dumating at ginalaw ang mga gamit
sa loob, ngunit gaya ng inaasahan, wala. Sapagkat, kung walang ibang naroon,
alam niyang tanungin sa sarili kung saan galing ang lahat ng ito-- ang bahay,
kagamitan at siya mismo. Hindi niya alam kung nasaan siya at saan siya galing
ngunit alam niyang magtanong ng kadahilanan sa lahat ng bagay. Wala siyang alam
kung paano siya pumarito. Saan siya patungo mula rito, ang siyang misteryong mas
mahalaga sa kanyang isipan.
Dumidilim na ang paligid. Binuhat niya ang isa sa dalawang
puting upuan papalabas ng bahay. Umupo siya rito at pinanood ang kulisap, ang
itim na bato sa malayo. Nagsasalita siya na para bang kinakausap ito.
Matindi ang lungkot na kanyang nararamdaman. Hindi na siya
makaiyak dahil sa totoo lang, siya'y apat na araw nang humagulgol sa iyak.
Hinahaplos niya ang tiyan niya gawa ng matinding gutom.
Napalitan ng mga bituin ang mga huling sinag ng araw sa
kalangitan ng dapithapon. Sa pagdilim ng paligid, hindi na niya naaaninag ang
kulisap. Ito ang hudyat niya sa sarili upang matulog. Siya ay inantok hanggang
sa makatulog sa bangkong niluluklukan niya.
Makalipas ang ilang oras, bago pa man basagin ng liwanag
ang kadiliman, siya'y ginising ng kumakalam niyang sikmura. Napakalamig na
ngunit binali-wala lang niya ito sa kabila ng suot niyang pambahay. Dumiretso
siya sa loob ng bahay at umihi sa palikuran. Kiniskis ng kamay niya ang
giniginaw na balikat. Dinampot niya sa lamesa ang metal na plato at galit
niyang inihampas ito ng paulit-ulit sa lamesa. Napaiyak siyang muli na tumutulo
ang laway at siya'y napaupo sa sahig. Sumigaw siya ng napakalakas ng maraming
beses. Wala siyang ginawa kundi isipin ang unang araw niya sa lugar na ito.
Isang umaga'y nagising siya sa isang malambot at maputing
sofa, apat na araw na itong nakalipas. Pagbangon niya, may dinatnan siyang
pagkain sa lamesa. Ang mga narito ay oatmeal, tinapay, beans, mansanas, saging
at gatas. Hindi niya maintindihan kung saan galing ang mga ito, ngunit alam
niya na kinakain ito. Dinampot niya ang baso ng gatas, inamoy at inilapag din
ito. Lumabas siya suot ang short at sandals. Takang taka siya, paulit ulit na
tinatanong sa sarili kung nasaan siya. Siya ay sumisigaw ng saklolo sa pinaka
malakas na sigaw na kaya niya, naghahanap siya ng kasama. Umiikot siya sa buong
paligid ng bahay. Takang taka siya sa nangyayari. Ilang oras pa bago siya
uminahon at tumigil sa pag-ikot. Pumasok at kinain niya ang kalahati sa mga
pagkain sa lamesa. Alam niyang hinahalo sa oatmeal ang gatas pero mas pinili
niyang inumin ito sa baso, inihalo niya ang kalahati sa platong metal at inubos
ang oatmeal.
Inaral niya ang loob ng bahay pagkatapos. May
hile-hilerang hugis kwadradong board na nakaipon sa lalagyan ang umagaw ng
kanyang pansin. Binuklat niya na parang aklat ang magkakadikit na mga boards,
narito ang backgammon, chess board at iba pang board games. Isang kahong
mala-kahoy naman ang naglalaman ng playing cards, mga dice, at iba pang gamit
ng board game gaya ng piyesa ng chess.
May refrigerator, lababo, mga gripo na may tubig, banyo at
hiwalay na palikuran. May isang kwarto na may kama, ilaw, at kabinet na may
sampung pares ng maputlang asul na damit, pantalon at sapatos. Gawa sa puting
heksaganong tiles naman ang sahig. Sa sala nama'y gawa sa makinis na semento
ang sahig. May mga basahan at babasahing magasin na hindi niya maintindihan ang
nakasulat ngunit naglalaman ng mga larawang naiintindihan niya. May lampara,
flashlight, gunting, gamit sa kusina, telebisyong
kwadrado na hindi gumagana, lumang radyo na hindi gumagana, pekeng sunflower na
nasa paso, picture frames na may larawan ng mga di kilalang tao, at maliit na
estatwa ng nakapiring na babaeng may hawak na timbangan na nakapatong sa maliit
na mesa. Ngunit ang umagaw ng kanyang pansin ay ang isang itim na kahong may
music box sa loob na nasa ilalim ng munting patungan. Hinipan niya ang alikabok
na bumalot sa ibabaw nito. Gawa sa ginto at itim na kahoy ang music box na ito.
Kapag pinihit ang kalawit, sumasayaw ang imahe ng babaeng balet dancer at
tumutugtog ang tono ng twinkle twinkle little star, pagkatapos nama'y susundan
ng tonong happy birthday.
Binitbit niya ang music box, inikot ang susi nito at
tumugtog. Matagal niyang nilaro at tinitigan ang itim na musicbox na ito. Sa
bandang tanghali, lumabas siya para tuklasin ang ibabaw ng munting lambak sa
gawing itaas ng kinatuturukan ng bahay niya. Inakyat niya ang hugis kulisap na
bato bitbit ang music box. Hinawakan niya ang batong kulisap at namangha siya
rito. Mula doon, siniyasat niya ang napakaluwang at walang lamang ispasyo ng
buhangin at disyertong tanawin. Sinilip niya sa butas na ginawa niya sa kanyang
kanang kamay ang kanyang asul na bahay sa malayo, sa gawing ibaba. Bumalik lang
siya paibaba sa bahay at umasang may mga dadalaw sa kanya upang alisin sa sa
malungkot, masalimuot at tahimik na lugar na ito. Naisip niyang hindi lumayo
sapagkat saan galing ang lahat ng gamit at bahay kung walang naglagay nito
dito?
Ikalawang araw nang unang beses siyang makaranas ng gutom,
tiniis niya ito at uminom na lang ng tubig sa gripo. Noong hindi niya kayanin,
inubos na niya ang natitirang tinapay sa lamesa. Umaga nang kainin niya at
ubusin ang mga prutas. Nakaramdam rin siya ng matinding kalungkutan sa pag-iisa
sa unang pagkakataon. Unang araw pa lang, hindi na niya matiis ang pag-iisa.
Ngunit ngayon, hindi niya matiis ang inip. Inilatag niya ang chess board. Alam
niyang kaya niyang gamitin ito kaya't isinaayos niya ang mga piyesa nito sa
tamang pormasyon, sa tamang pwesto pero wala siyang kalaro. Nainis siya sa
pagkabagot at hinampas ng unan ang mga piyesang nakatayo. Lumabas siyang muli
ng nakasimangot ang mukha at sinubukan niyang takbuhin ang iba't ibang
direksyon habang sumisigaw ng saklolo sa abot ng kanyang makakaya. Naghahanap
siya ng sinoman, ngunit bawat direksyon ay natatakpan ng maliit na lambak.
Nakatingala siya sa ibabaw ng lambak, nakatanaw sa mala-abong kalangitan at
tinatanong niya ng paulit ulit ng pasigaw kung nasaan siya. Ang masaklap para sa
kanya ay alam rin niya na sa bawat pintig ng puso niya, may kasiguraduhang
hindi siya sasagutin nino man. Sa sobrang tahimik, ang bawat pintig ng puso
niya'y rinig sa paligid. Nanatiling patay at tahimik ang kapaligiran. Puro
batuhan at lupang mapula lang ang paligid sa labas ng bahay. Hindi siya
nakatulog pagsapit ng gabi. Takot naman siyang umakyat ng lambak at lumayo.
Siya'y humagulgol na lamang sa iyak ng magdamag, sapagkat hindi niya alam ang
nangyayari.
Ikatlong araw ng hanapin niya sa ilalim ng lababo ang
balat ng saging, maitim na ito at hindi na makakain. Siya ay gutom na gutom na.
Lumabas siya suot ang balabal at umakyat. Tatlong oras niyang nilakad ang
dakong malayo pa sa palatandaan niyang kulisap. Takot man siya sa ano mang
makita sa kalayuan ngunit pinagpatuloy niya ang pagtuklas. Walang katapusang
disyertong mabato ang natagpuan niya at bumalik rin. Lalo lang siyang nagutom
sa pagod. Pagbalik niya, namumuo na ang alikabok sa loob ng bahay. Sa bawat
sulok ng bahay, naghahanap siya ng pagkain na tulad sa kinain niya kamakailan
lang, ngunit nabigo siya. Maalikabok man ang katawan niya, hindi niya tinigilan
ang paghalungkat ng gamit sa paghahanap ng makakain.
Siya ay humagulgol sa kadiliman ng gabi gawa ng sakit ng
sikmura. Abot ang iyak niya hanggang sa kalayuan, ngunit walang sinoman ang
makaririnig sa kanya. Alam niyang nasa gitna siya ng kawalan. Alam niyang
nag-iisa lang siya sa napakaluwang at tuyong disyerto. Naglinis siya ng
katawan, naligo at nagpalit ng suot. Nakatulog siya ng gabing iyon. Sa kanyang
panaginip, siya ay lumayo, naghanap ng makikita ngunit nabigo siya. Pagbalik
niya, wala na ang bahay, natakot siya at biglang bumangon mula sa bangungot.
Siya ay natabunan ng kumot sa kamang puti. Naging mas matindi ang ramdam niyang
takot. Balik sa katotohanan na rin siya, nakahawak ang kamay niya sa sikmurang
kumakalam. Ito ang mga kaganapan kaya't siya ay nagtitiis sa gutom at
kalungkutan.
Ikaapat na araw noong siya'y nakasisiguradong nag-iisa
lang siya at kailangan talaga niyang tuklasin ang kalayuan. Pag-akyat niya sa
lambak, natapilok siya at sumadsad sa mabato at matirik na daan,
nagpagulong-gulong siya paibaba. Doon niya nakuha ang mga sugat niya sa siko at
pilay sa paa. Hindi dito nagtapos ang araw niya, anim na oras siyang naglakbay
para lang matutunang walang matatagpuan sa kalayuan, hanggang siya nga'y umuwi
at abutan ng antok sa puting upuan.
II
Ikalimang araw na ngayon. Siya ay nakadapa sa maalikabok
na sementong sahig ng bahay at nakatunganga. Hindi siya gumagalaw. Tumutulo ang
laway niya't tulala ang mga mata niya. Gutom, kalungkutan at pagkataka sa
nangyayari ang laman ng isip niya. Suko na siya, hindi na niya ninanais pang
akyatin at tuklasin ang kabilang lugar, sa likuran ng bahay, sa itaas ng libis
ng lilim, doon sa gawing silangan. Hindi na, suko na.
Bukas ang ilaw ng buong bahay. Mag-uumaga na ngunit
napakadilim pa sa labas. Nakadapa siya sa sahig na maalikabok, kung saan nasa
sahig rin ang metal na plato na pinaghahampas niya kanina. Maalikabok ang
kaliwang mukha niyang nakabagsak sa sahig. Nakatitig siya sa itim na piyesa ng
chess, ang King, na nakatayo sa sahig kasama ang ibang piyesa na nagkalat.
Biglang may narinig siyang malakas na pagsabog sa malayo! Nayanig ang bahay at
bumagsak ang malaking frame ng isa sa mga larawan sa lakas ng pagyanig ng lupa.
Nabasag bigla ang katahimikan. Napatayo siya at takot na tinakpan ng braso niya
ang kanyang mga mata, gawa ng nakakapuwing na alikabok na dulot ng hangin at ng
napakaliwanag na ilaw na nanggagaling sa labas.
Napakaingay sa labas, para bang may ginigiling na naglalakihang mga
bato. Dahil sa malakas na hangin, pinapasok ng alikabok ang bintana at pintuan
ng bahay.
Siya ay inubo at nagtago sa banyo. Binuksan niya ang
shower at tinakpan niya ang kanyang tenga. Takot na takot siya sa nakabibinging
ingay sa labas at sa nakabubulag na liwanag.
Matapos ang kalahating oras, tumahimik bigla, dumilim ang
paligid. Naging putik ang alabok na nakapasok sa loob ng banyo, habang siya
nama'y nakasalampak sa sahig nito at nakasiksik sa sulok. Dahan dahan siyang
tumayo at pinatay ang shower. Binuksan niya ang pinto ng banyo at siya'y
lumabas ng basang basa.
Laking gulat niya ng matanaw sa kaunting sinag ng araw ang
napakataas na tila'y toreng itim doon sa itaas ng lambak, malayo ng bahagya sa
batong tinawag niyang kulisap. Ang Tore ay tila isang nakatindig na anino. Ito
ay may kataasan. May patag na pabilog at dambuhalang bagay sa tuktok nito ang
sinusuportahan ng pahabang pundasyong hugis silindriko.
Mabilis niyang sinuot ang pantalon at itinirintas ang tali
ng kanyang sapatos. Basa man ang damit panloob, sinuot niya ang pangitaas na
may mahabang manggas ng hindi isinasara ang zipper at dumiretso sa kwarto.
Dinampot niya ang flashlight at tumakbo palabas, papalapit sa itim na bagay.
Siya ay nanlalambot na ngunit kailangan niyang makalapit dito. Habang umaakyat
siya sa gilid ng mataas na libis palapit dito, nakikinita niya ang makintab na
pagkakagawa ng itim na tuktok sa paunti-unting liwanag na umuusbong mula sa
silangan. Kapansin pansin ang papilipit na desenyo nito. Bahagya itong
bumabagal sa pag-ikot.
Hawig sa piyesang "rook" ng chess ang toreng
itim, ngunit labis ang lapad ng tuktok nito. Nakalapit na siya rito ng
hinihingal matapos ang ilang minuto. Itinutok niya ang flashlight dito. Ang mas
kaagaw-agaw ng pansin ay ang itim na modulang bilog sa tuktok. Hindi niya abot
ang tila'y hagdan paakyat dito. Itinutok niya ang ilaw sa pundasyong palipit.
Tumatalbog ang ilaw nang itutok dito ngunit ang puting ilaw ay napapalitan ng
iba't ibang kulay paglabas. Hinawakan niya ang madulas, makintab at itim na
pundasyon nito. May naiiwang liwanag sa bawat haplos niya sa misteryoso at
higanteng poste. Bumabakas ng bakas na liwanag ang kamay at mga daliri niyang
dumidikit dito. Napansin rin niyang nakabaon ang pundasyon at gumawa ito ng mga
biyak sa lupa. Hugis tornilyo ang buong istraktura. Palipit ang hugis ng
pundasyon, hawig sa tornilyo maging ang napakalaking modulang sinusuportahan
nito sa tuktok ay palipit din ang hugis. Mga dalawampung metro ang taas ng
toreng itim. Ang modulang itim na hugis bilog na umiikot sa itaas ay may lapad
na halos limampung metro. Kaunting sandali pa ay huminto sa pag-ikot ang bilog
at patag na tuktok.
Sa itaas, siya'y tumingala at may nakita siyang bumubukas
na lagusang pabilog. Lumiwanag ang bilog
na pintuan mula sa looban nito at pansing may bumababa sa riles ng hagdan.
Labis ang pagkataka niya at pagkasabik sa nangyayari. Napangiti siya ngunit may
takot at duda sa kanyang dibdib. Sumisibol naman ang araw sa gawing likuran, sa
itaas ng burol kung nasaan ang bahay na asul, kaya't lalong kita na ang hugis
ng bumababa. Pinatay niya ang flashlight. Sisigaw sana siya sa bumababa ngunit
siya'y paos na pala. Natakot siya sa nangyayari sa kanya, napaatras siya at
sinuri ang lalamunan, hinimas niya ito. Tumingala siyang muli at nangangalahati
na ang bumababa. Naaaninag na ang wangis nito, hugis tao ito ngunit hindi ito
tao. Isa itong maitim na robot na walang mukha. Mataas ang itim na dayo. May
bitbit itong puting bagahe sa kanyang likuran. Kulay pilak ang makintab nitong
katawan na may halong kulay asul ngunit nangingibabaw ang itim na kulay. Sa itsura
nito, alam ng lalaki na isa itong nilalang na gawa sa metal, isang robot. Sa
paos na boses, sinabi ng lalaki sa bumababa, "Sino ka? Sino ka?"
ngunit hindi siya sinagot nito at patuloy ang pagbaba sa riles ng hagdan.
Pagdating sa dulo ng hagdan, ang robot ay nakalambitin,
dahil may dalawampung talampakang taas ang dulo mula sa lapag. Nayanig ng
bahagya ang kalupaan nang bumitaw siya at nagpahulog. Nang tumayo ito, lantad
na mataas lang siya ng bahagya sa lalaki. May taas na anim na talampakan ang dumayong
robot. Mukhang tao ang katawan nito maliban sa kapansin-pansing blangkong itim
na mukha nito na may sumasayaw na liwanag. Tumayo lang ito sa kanyang harapan
ng ilang segundo. Natakot man ang lalaki, napaatras lang siya ng bahagya at
nanatiling nakatayo.
"Hello, Solo. Pril ang itawag mo sa akin." ang
biglang iniwika ng robot na may boses lalaki. "Isa akong Bargaan,
Sitrarya. Nandito ako para sa iyo. Naghintay ako ng matagal na panahon para
dito. Ipapaliwanag ko ang lahat sa iyo, huwag kang mabahala. Makakasama mo ako
ng matagal na panahon, mahaba pa ang oras natin." Sinuri ng robot ang
lalaki, mula paa hanggang ulo. Takang-taka namang nakatitig ang lalaki sa
nagpapalit na ilaw sa mukha nito. Nagsalita muli ang robot, "Samahan mo
ako sa barracks. May ibibigay ako sa iyo".
Habang nagsasalita ang robot, nagbabago ang liwanag sa
madilim na tila'y pakurbang salaming mukha nito. May tumatatak sa mukha nito na
animo'y sumasayaw na ilaw sa tuwing nagbabago ang tono at lakas ng boses.
Maliban sa tono, siya ay hugis lalaking tao rin, may ulo, bilugang balikat, may
limang daliri sa bawat kamay na may kahabaan, maging sa paa, ngunit ang mukha
niya ay gawa lang sa itim na makinis na salaming pakurba at pabilog na may
liwanag na parating nagpapalit anyo. Gawa sa makintab na metal ang
mala-kaliskis na balat niya. Batid din ang pagkilos na normal nito na wangis sa
tao.
"Sasabihin ko na ang totoo. Ang wika na lumalabas sa
iyong bibig, ang lahat ng iyong kaalaman at naiintindihan ay galing sa
akin," ang tugon ng robot. "Ikaw mismo ay galing doon, ginawa ka
galing sa itaas". Tinuro ng robot na si Pril ang pabilog na tuktok ng
tore. "Ang salita natin, ang wikang naiintindihan mo ay natatangi, ginawa
lang para sa iyo. Tayong dalawa lang, sa ngayon ang nakaiintindi ng salitang ito.
Ikaw, Solo ay kakaiba. Ikaw ay natatangi at hindi ako makapaghintay na
ipaliwanag sa iyo ang iyong pagparito. Sa ngayon tanggapin mo ito."
Inabot ng misteryosong robot ang isang banig ng tsokolate
sa lalaki. Agad naman itong inagaw ng lalaki at kinain. Nagmamadali itong
lunukin ang unang pagkain na kinain niya sa loob ng ilang araw. "May mga
dala pa akong pagkain, sa bahay ko na lang ibibigay, hindi dito." Sinabi
ng robot ito sapagkat matirik ang mabatong dinaraanan nila paibaba. Sumangayon lang
ang lalaki at magiliw itong tumakbo papalayo, papuntang bahay.
Tumakbo ang lalaki, paminsan minsa'y lumilingon pabalik at
pansin niyang parang tao lang kumilos ang naglalakad na robot pababa ng lambak.
Binilisan pa niya ang takbo hanggang makauwi siya, ibinato ang flashlight sa
puting sofa. Nagmamadali siyang naglinis ng lamesa at mga plato habang
pinapanood sa bintana sa buong pagkasabik ang paparating na robot. Nasasabik
siya at hindi nag-aalangan, gawa ng matinding gutom. Maalikabok ang bahay mula
labas hanggang sa loob. Sa labas, nakikita na ang bubong nito sa pagsibol ng
araw ngunit natatakpan pa rin ito ng anino ng burol sa likuran nito.
Sa wakas, nakaabot na sa pintuan ang robot. Siya ang
nakikitang lunas ng kumakalam na sikmura ng lalaki.
Binuklat ng robot ang puting bag nito at inilabas ang
hamon, keso, letsugas, mga tinapay at isang bote ng gatas. Mabilis na inagaw ng
lalaki ang tinapay. Mainam na kumain ang lalaking gutom na gutom. Masayang
masaya siyang kumakain ng walang imik.
Samantala, ang robot na si Pril ay nakaharap lang sa
kanya, nakaupo sa kabilang dulo ng lamesa. Nakalapag naman ang mga kamay nito
sa mesa. "Pasensya na, hindi ko alam." ang sinabi ng robot sa lalaki
habang pinapanood siya ng masinsinan.
"Hindi alam? Alin?" ang sagot naman ng lalaki sa
paos at mahinang boses.
Napalitan ng berdeng liwanag ang nagpapalit-palit na ilaw
sa pakurba at madilim na mukha ng robot, at sinagot ang tanong ng kausap,
"Hindi ko alam na gugutumin ka bago ako bumalik."
"Bakit? Hindi ba't sabi mo ginawa mo lang ako? Galing
ka dito, sa bahay, tama? Saan ka ba pumunta? Bakit ako nagugutom?" sagot
ng lalaki habang kinakagat ang malambot na tinapay.
"Sa totoo lang, hindi kita ginawa. Nabuo ang katawan
mo at memorya mo dahil sa akin, pero hindi kita ginawa." ang sagot ng
robot. "Marami akong hindi alam sa katawan mo, nangangapa lang tayo sa
dilim. Hindi ko alam na gugutumin ka. Hindi mo rin alam na kaya mo tinanong ito
dahil ang abot ng aming kaalaman lang ang maibibigay namin sa iyo. Sa totoo
lang, ang alam ko lang ay ikaw ang misyon ko. Ang tore sa labas, ay ang
tinatawag na Reca, ang sasakyan na nagdala sa akin sa disyertong planetang ito.
Hindi ito ordinaryong sasakyan, Solo, nagtataglay ito ng mga kahuli-hulihang
impormasyon ng nakaraan na matagal nang nawasak at naglaho.
Kaya nitong baguhin ang mga elemento, ayusin sa tamang
pormasyon ang mga atomo ng mga materyal sa kalikasan gaya ng bato at mga
mineral upang makabuo ng bagong anyo. Ang bahay na ito, ikaw, at ang pagkaing
kinakain mo ngayon ay binuo gamit ang makinarya at kasangkapang programa ng
Reca, pitong araw na ang nakakaraan. Ikaw ang huling inilabas nito.
Matapos kang ilabas ng pentagonong kristal, doon sa loob
ng Reca, binuhat kita rito paibaba, hanggang barracks at iniwan kita ng walang
malay sa puting sofa na nasa likod ko. Sinuri ko ang pulso, tibok ng puso at
pag-hinga mo bago kita nilisan. Iyon ang mga unang oras ng paghinga mo bilang
tao. Hindi na kita hinintay magising
dahil alam kong matatakot ka lang kapag nakita ako. Iniwan ko ang pagkaing
inakala kong sobra pa sa iyo. Ang nag-asemblo at nag-sugo sa akin ay walang
alam sa kaselanan ng katawan ng tao sa ugnayan nito sa kinakain niya. Ulitin ko
na lubos akong humihingi ng paumanhin, Solo."
May tinititigan ang lalaki sa maliit na mesa sa tapat ng
sofa, tumatango lang siya bilang sagot sa kausap. Nagpatuloy naman ang robot
matapos ibalik ng lalaki ang atensyon sa kausap.
"Sa totoo lang, ang lahat ng alam mo, lahat ng
nakikita mo sa bahay na ito, ang suot mong damit, ang memorya at kaalaman mo,
ang bahay na ito ay nakabase sa mga kaunting natitirang kaalaman ng kabihasnan
ng Quilax tungkol sa buhay ng makalumang sangkatauhan.
Inaasahan kong mahihirapan kang makita ako sa unang
pagkakataon. Maaaring likas sa taong pagkatiwalaan ang unang makita ng kanilang
mata, o kaya'y dahil sa gutom kaya sumubok kang magtiwala. Wala kang kailangang
ipangamba, hindi kita sasaktan."
Saglit na huminto sa pagkain at tumayo ang lalaki, uminom
ng tubig sa lababo at siya ay umupo, habang ngumunguya. "Kilaks?" ang
tugon niya.
"Naniniwala ang iba sa mga Quillians, Solo, na ang
mga tao, gaya mo ay ang gumawa ng lahi nila, ngunit hindi nila ito
mapatunayan." ang patuloy ni Pril. "Ang lahat ng pamamaraan sa pagbuo
ng tao, sa eksakto, natural, malinis, walang bahid at purong detalye, maging
ang mga bagay na kailangan ng nilalang na ito para mabuhay ay nakalagay sa utak
ng Reca, sa aking sasakyan. Walang nakahalo rito sa bahay ang hindi konektado
sa tunay na nakaraan ng kabihasnan ng tao. Ako ang tagabantay at tagapangalaga
ng sasakyang Reca. Kaya nitong mabuo ang ano mang bagay na alam nitong gawin
gaya ng mga pagkain mo. Ang sangkap lang na kailangan ay instruksyon sa
pagpapalit anyo at pagsasama ng mga atomo upang mapalabas ang ano mang nais
nating isalin mula sa nakaimbak na kasulatang instruksyon hanggang sa mabuo ito
sa aktwal na bagay, buhay man ito o hindi. Nandito tayo para ilabas ang mga
sekreto ng Reca, Solo. Kapag ikaw ay handa na, ikaw ang magmamana ng Reca. Sa
ngayon, nandito ako para sagutin ang lahat ng katanungan mo. Nandito ako para
turuan at sanayin ka. Napakarami ng ating gagawin. Magpahinga ka muna, kawawang
nilalang. Marami kang hindi nalalaman."
Napahinto ang lalaking kumakain na marumi ang kamay at
bibig nito. Napatitig siya sa mukha ng robot, inilabas ang dinaramdam nito at
paos na nagtanong, "Ki-Kilans? Kilaks? Anong Kilans? Anong lahi? Bakit
sumakit ang tyan ko noong hindi nakakakain? Ano ka, Pril? Bakit, teka, paano
tayo nakakapag usap? Bakit hindi ko maintindihan, napakarami kong alam, pero
wala akong naalala kundi yung nagising ako dito, sa bahay na ito?"
pinunasan niya ang sipon na tumutulo sa kanyang damit at nagtanong muli sa
hirap at paos na boses. "Sabi mo iniwan mo ako, saan ka pumunta?"
Nakakunot ang ulo ng lalaki habang sinisinok ito.
Nalunasan nga ang gutom ng nananakit na tyan niya, siya nama'y uhaw pa rin sa
katotohanan.
"Noong iniwan kita, lumipad patungong buwan ng
planetang ito ang Reca, may binalikan ako doon na kakailanganin mo. Sa ngayon,
hindi kita masasagot sa lahat ng tanong mo, bukas kita sasagutin. Magpahinga
ka, kakailanganin mo ang lakas mo. Ang masasabi ko lang sa ngayon, kailangan
mong ipahinga ang katawan mo."
"Saan, ito?" Sabay kaway ang dalawang kamay ng
lalaki, pinahihiwatig na tinutukoy niya ang lahat sa paligid.
"Solo, ikaw ay
nasa planetang Ares, planetang napakalayo sa pinagmulan. Planetang nakatutok sa
bituing nakatago, at di kayang abutin ng mga instrumento ng mga Quillians at
Penttos. Pinangalan ang planetang ito sa isang dakilang Quillian na siyang
nakadiskubre nito. Siya rin ang nangarap at nagplanong ibalik ang lahi mo. Ang
buwan ng planetang ito ay tinawag na Trewui, ipinangalan naman sa kanyang anak
na babae, ang nagpatuloy ng kanyang pinaglalaban. Naniniwala ang dakilang si
Ares na ang kanilang lahi, ang Quillians ay nanggaling at nagsimula sa tao.
Naniniwala silang maging ang Penttos, mga naunang nilalang sa Quillians ay
naunang ginawa ng mga tao sa kanilang makalumang laboratoryo.
Naniniwala siyang marami sa mga tuklas na prinsipyo sa
matematika at agham ay galing lamang sa mga tao, libo-libong taon bago lumitaw
ang mga organikong nilalang gaya ng Penttos, Quillians at maging mga mekanikal
na nilalang tulad ko. Ang lahat ay galing sa tao. Ito ang dahilan ng pagparito
mo, maaaring pagtanaw ng mga mabuting nilalang ng utang na loob sa mga tao. Ang
mga Quillians ay mga mukhang tao rin, kaparehas mo, gaya ng mga Penttos, pero
mas matatangkad, mas maliliksi, at mas matatalino sila sa tao. Ang mga
Quillians ay mas simpatiko sa mga tao. Mas mataas ng limampung pursyento ang
utak nila sa iyo, sa mga tao. Sapagkat dinesenyo silang ganito, hindi gaya ng
mga agresibo't oportunistang mga Penttos.
Ayon sa turo ng dakilang Ares, ang mga Quillians umano ang
huling nilalang na ginawa ng tao na base rin sa henetiko ng tao. Pakay nilang
gawing tagapagtanggol ang mga Quillians laban sa Penttos at sa iba pang
mapanganib na mga nilalang rin ng tao. Ang dugo, ang pinagmulang henetikong
binago ng mga Penttos at Quillians ay galing rin sa tao, pinabuti pa ito sa
kalagayang higit sa ano mang binuo ng tao sa kasaysayan. Kaya't ang mga
sinaunang Penttos at mga makabagong Quillians ay mas malaki sa tao, hindi
nagkakasakit, matatalino at hindi humihina. Mga mukha silang tao ngunit mahaba
ang kanilang mga ulo. Hindi sila mahina at marupok gaya ng mga tao.
Upang paikliin ang napakahabang kasaysayan, sa bandang
huli, ang mga tao ay ginawang alipin sa loob ng apat na libong taon. Pinalaya
sila ng isang Quillian, ang maawaing si Yuki Alrasing. Isa siyang dakilang
Quillian sa mga tao ngunit kinamumunghian ng mga kapwa niya Quillian at maging
mga Penttos na nakakakilala sa kanya. Ilang daang taon lang ang nakalipas,
matapos ang pagpapalaya, inubos ang lahi ng mga tao ng mga Penttos. Inubos,
pinatay lahat ng tao matapos matalo sa digmaan ang huling siyudad ng mga
Quillians na nagsilbing huling tahanan nila. Saan man sila nakatago ay nahanap
sila’t inubos. Naubos na ang sangkatauhan, Solo. Makalipas ang libo-libong
taon, binago ang paniniwala ng lahat ng buhay sa ilalim ng Von-gorg, ang
nag-iisang kaharian na namumuno sa bawat kolonya. Lahat ng Penttos at Quillians
ay obligadong maniwala sa kasaysayang dikta ng Von-gorg. Binubura nila ang
lahat ng bakas ng nakaraan na kaya nilang abutin. Matapos ang libo-libong taon,
napadali ang pagpapalit ng tanggap na katotohanan sa sangkalahatan. May bagong
kasaysayan na itinuturo sa lahat na taliwas sa katotohanan. Ngunit isang
siyudad ng kabihasnan ng Quillax ang may ibang sinasabi, naniniwala silang ang
extinct, ang ubos na lahi ng mga tao ang siyang gumawa sa mga Quillians at
maging ang mas matandang lahi na Penttos.
Libong taon lang matapos mamatay ang huling tao, limot na
halos ang kasaysayan nila. Ang alam ng lahat, ang mga Penttos ang
pinanggalingan ng mga Quillians at ng mga tao. Hindi ito ang katotohanan ngunit
bawal itong kontrahin. Isang siyudad-kolonyal ang nag-iisang ligtas na tahanan
ng kasaysayang pinaniniwalaan naming tunay."
"Saan galing ang tao? Anong ibig sabihin nito?"
tanong ng lalaki.
"Ang lahat ay galing sa tao, base ito sa matandang
aral ng sinaunang Quillian, na isang Ares ang pangalan. Siya ay nanirahan sa
planetang Soel. Sa kanya pinangalan ang disyertong planetang ito, ang planetang
Ares. Namuhay si Ares sampung libong taon na ang nakalipas ng maubos ang mga
taong niligtas ni Yuki Alrasing." sagot ng robot. "May ina-angkin ang isang siyudad, higit
sa dalawang libong taon na ang nakalipas sa panahon naman ng paslangin si Ares.
Siyudad ito na matagal na ring nawasak. Siyudad na tinatawag na Hiitan, na matatagpuan
sa buwan ng Zad-ark. Ang buwan na ito ay pinangalan sa isang Hari ng Penttos.
Binuo ng mga Quillians ang Hiitan. Ang buwan na Zad-ark kung nasaan ang
sagradong lungsod ng Hiitanites ay libo-libong taong tinatawag na Titan bago
baguhin ang pangalan nito sa dikta ng mga Penttos. Isa ito sa mga buwan ng
planetang Saturn. Ang mga Hiitanites ang nagsilbing tagapangalaga ng sekreto ni
Ares. Ito ang lahat ng kanyang mga tuklas, kasama rito ang DNA ng tao, maging
ang mga natitirang impormasyon tungkol sa buhay at kabihasnan nila. Ang lahat
ng ito ay nakatago sa isang Lungsod-kolonyal na Hiitan. Gumawa sila ng maraming
kopya ngunit lahat ay nawasak nang sa bandang huli ay wasakin ang kabihasnan
nila. Isang kopya lang ang natitira at ito'y nasa pangangalaga ng Reca! Ang
Tore sa labas kung saan mo ako nakitang lumabas. Ako ay nakasisiguradong
nag-iisa na lamang ito. Ang hiyas ng kabihasnan ng lahi mo ang dinala ng aking
sasakyan sa karagatan ng mga bituin, ang antikong buhay na ala-ala ng
sangkatauhan, ala-ala ng nakaraang halos alamat na lamang kung turingin. Burado
na sa kasaysayan ang lahi at kabihasnan ng mga tao, marami ang duda kung tunay
ang kwento ng nakaraan nila. Napakarami ng nasawi, Solo, nag-alay ng buhay
maprotektahan lamang ito. Itong inaalagaan ng Reca sa loob ng daan-daang libong
taon sa kaluwangan ng kalawakan ay mahigpit kong binantayan. Hanggang sa
marating natin ang planetang ito, ang Ares, ang ating pakay."
"Wala akong maintindihan." sagot ng lalaki.
Mula sa bag, nilabas ni Pril ang toothpaste, toothbrush,
sabon at shampoo. Biglang nag iba ang kulay ng liwanag sa mukha ng robot mula
berde hanggang maging asul, "Heto, maligo ka na, ipagpatuloy mo na muna sa
ligo iyan." tinuro ng robot ang putikang damit ng lalaki.
"May dala kang toothpaste?" tugon ng lalaki.
Humagakgak sa tawa ang robot sa reaksyon niya. Mukhang
hindi nakikinig ang lalaki. Napalitan ng pakurbang liwanag ang sumulat sa mukha
nito. Tumawa rin ang lalaki, para bang nadala sa reakyon ng robot. Tumayo na
siya, humikab at agad na nagtoothbrush at naligo pagkatapos.
III
Matapos maligo ng lalaki, nasurpresa siya sa malinis na
paligid sa labas ng banyo. Hindi na maalikabok ang bahay. Nakita niya sa labas
na kinukumpuni ng robot na si Pril ang pintuan, nilalagyan niya ito ng pintong
salamin. May salamin na rin ang bukas na bintana. May dalawang bilog na dilaw
na ilaw ang gumuhit sa mukha ni Pril na animo'y mga mata habang nagkukumpuni
ito mula sa labas. Maliwanag na rin sa labas. Ang sinag ng araw ay
paunti-unting nakakapasok sa lambak na kinatitirikan ng bahay.
Napansin rin niya ang pulang twalya sa puting sofa. May
mga bagong gamit naman sa kusina. Dinampot ng lalaki ang twalya at pumasok sa
loob ng kwarto. May mga iba't ibang uri ng damit sa kabinet, napatingin siya sa
labas kung nasaan ang robot bago damputin sa kama ang dilaw na t-shirt at isuot
ito. Humiga at natulog ang lalaki ng ilang oras.
Pumasok sa loob ang robot, siniyasat niya ang pinto.
Patuloy itong nangumpuni at bumabalik paakyat ng lambak, paakyat ng tore ng
Reca at ibinababa ang mga gamit mula rito.
Makalipas ang ilang oras, lumabas ng kwarto ang lalaki.
Ibinabalik ng robot sa pwesto ang malaking painting ng babaeng may pigil na
ngiti na nabasag ang salamin sa pagyanig ng lupa kagabi. Maayos na itong
nakasabit na para bang walang nangyari. Inilipat niya sa tabi ng imahe ng
babaeng nakapiring ang musicbox na nakabagsak sa sahig. Tila'y nagbuntong
hininga itong parang tao at umupo sa upuan sa tabi ng mesa.
Samantala, tumingin naman ang lalaki sa isa sa mga maliit
na kwadro, may larawan ng dalawang lalaking nakaputi na nagpapaligsahan sa
larong fencing. Ang isa sa dalawa ay walang suot na proteksyon sa mukha. Ang
isa naman ay nababalot ng itim ang mukha nito na hawig ng robot.
Tumingin sa paligid ang nakaupong robot at nagsalita,
"Halika, tuturuan kitang magluto." tumayo ito, kumuha ng itlog sa
refrigerator at binuksan ang lalagyan ng gamit sa kusina.
Siniyasat ng binatilyong tao ang kanyang memorya, habang
ito'y nagkakamot ng ulo. Natuklasan niya na may kaunting alam siya sa
pagluluto. Siya'y napatingin sa malayo at napa-isip. Nakatingin ang robot sa
kanya, kinuha ang sandok at nagprito siya ng itlog habang nanonood ang lalaki.
"Teka," sabi ng lalaki, "paano ko alam ang
lahat ng ito, ang salita ko, ang itlog na niluluto mo, ang kahulugan ng
salitang luto, ang pabrika kung saan galing ang itlog" lumapit siya,
napakamot ng ulo at nagpatuloy, "paano ko alam gamitin ang sabon at
sipilyo kahit pa wala akong naaalala na tunay na gumamit na ako nito dati? Naisip
ko ito kanina sa loob ng banyo. Paano nangyari ito? Hindi ko maintindihan ang
nangyayari." Nangangamba ang lalaki sa maaaring maging reaksyon ng robot
sa mga tanong na inilalabas niya.
Humarap sa kanya ang robot na may bilog na kulay orange
naman na liwanag ang gumuguhit sa kanyang mukha at nagsalita, "Itinanim sa
iyong utak ang mga yan ng diwa ng Reca, siya ay si Sliin, makikilala mo siya
balang araw. Wala siyang pisikal na katawan di gaya ko at naroon siya sa itaas
ng Reca." sabay turo sa toreng itim sa malayo na kita sa bintana gamit ang
sandok.
"Pwede mo bang sabihin sa akin kung sino ako?"
tanong ng lalaki.
"Ah... Ikaw ay tao. Solo... ang tawag sa iyong uri.
May napakahabang kasaysayan ang pagparito mo, ang alam ko lang, kailangan
kitang buhayin. Ang unang kabanata ng misyon ay naganap na, buhay ka. Ngayon,
tuturuan kitang mabuhay."
"Sino ako? Ikaw si Pril, ako, sino ako? Anong
pangalan ko? Ano ang nakaraan ko? Saan ako galing? Tinatanong ko ito sa sarili
ko sa unang araw ng paggising ko. Sino ako? Makakahanap ba ako ng sagot sa
iyo?"
"Hmmm sandali," sagot ng robot at humarap ito sa
kanya. "Hindi madaling sagutin iyan sa salitang maiintindihan mo. Ang
kasangkapan ng iyong katawan, ang bawat molecules sa katawan mo ay galing sa
buwan ng planetang ito, ang Trewui. Ngunit ang instruksiyon at detalye ng
paggawa sa iyo ay galing sa Soel, planeta na dati'y tinatawag na Mars. Doon din
nakatira ang dakilang Ares na ikinuwento ko sa iyo."
"Anong pangalan ko Pril? Saan ako galing?
So-el?"
"Hindi ka nakikinig, Solo. Wala kang pangalan. Kung
gusto mo, ikaw, gumawa ka ng pangalan mo. Nakaraan? Ang DNA mo, ang henetikong
instruksyon ng pagbuo sa iyo, ang dugo mo, ang pinagmulan mo ay isinaayos at
inalagaang purong DNA ng tao sa pulang planetang Soel, daang taon matapos
mamatay ang dakilang si Ares. May mga Quillians noon na naniniwala sa teorya ni
Ares, ngunit hindi lahat. Matagal na panahon na yun simula noong namatay ang
kahuli-hulihang tao. Ang lahat ng katotohanan tungkol sa kabihasnan ng tao ay
hindi na malinaw at tiyak, kaya't nilikom nila sa Soel ang lahat ng relika ng
nakaraan na inaral pa ng dakilang Ares. May mga kumpletong instruksiyon na
nakasalin sa wika ng matematika ng pagbuo ng tao ang nailigtas ng mga tagasunod
ni Ares.
May panahon sa malayong nakaraan, sa pagitan ng taong
2140-2195, may umaapaw na impormasyon tungkol sa buhay ng tao. Panahon kung
kailan naging kasanayan sa planetang Earth na ang mga mayayaman, mga
maimpluwensyang tao at ang mga tinuturing na may halaga sa kasaysayan ay
nagpapadala ng sonda o probe na may instruksiyon ng pagbuo ng kanilang katawan.
Ang iba ay may taglay na ala-ala ng kilalang taong namayapa. Pinalilipad ito
palabas ng Solar System, ang sistemang pinagmulan. Nagkalat ang mga Sonda na
ito. Ang Solar System ay ang sistema ng bituwin na tinatawag na araw kung
nasaan ang Earth, ang pinagmulan ng lahat ng mga nilalang. Sa Earth nagmula ang
mga sinaunang uri ng robot na katulad ko. Ngunit mas nauna pa sa panahon ko ang
mga sonda ng mga taong ikinalat ang mga ito palabas ng sistemang bituin.
Ginagawa nila ito sa iba't ibang kadahilanan, karamihan dito'y may kinalaman sa
pagbigay parangal sa taong namayapa.
Marami ang mga ganitong uri ng sonda ang naglalakbay sa
kalawakan ang nailigtas at naitago ng mga Quillians ng Soel sa mga nagnanais
sumira. Pinag-aralan nila ang mga ito. Matapos ang ilang siglo ng digmaan,
itinago ang mga relikang impormasyon tungkol sa mga tao sa Hiitan, sa buwan na
Zad-ark. Hindi na sa pulang planeta nakaipon ang mga ito, sa Zad-ark na lamang
ligtas itong itago. Mula sa isang libong nailigtas, mga limampu na lang ang
natira sa mga sonda. Ito ang panahon ng
mga Hiitanites ng lungsod ng Hiitan, ang huling tahanan ng punla, ang hiyas ng
lahi at ala-ala ng kabihasnan ng mga tao. Noon pa man muntik nang nawasak ng tuluyan
ang pag-asang maibalik ang lahi ng mga tao.
Ikaw ay galing sa isa sa mga sonda na ito, daan-daang
libong taon na ang nakakaraan. Sa madaling salita, ang instruksyon sa pagbuo ng
ikaw ay masusundan ang pinagmulan-- ang Earth, ang ating tahanang planeta
mismo. Tahanan. Nakatutuwang isipin na tinatawag ko pa rin itong tahanan.
Ngunit ako rin, maging ang mga gumawa sa aking lahi na mga Quillians ay hindi
pa nakita ang Earth o nakalapit man lang dito. Instruksiyon lang ng pag-gawa,
mga patong patong na helera ng mga numero na nakaimbak sa tuusan ang kailangang
iligtas at maibabalik ang lahi ng taong pinaniniwalaan naming pinanggalingan ng
lahat. Ikaw na ang katuparan nito, Solo. Sa ganitong paraan din naibalik ang
mga pagkain at kagamitan na mga ito, binuo ng Reca mula sa mga atomo ng
planetang Ares, mula sa instrukyon na bitbit ng Sonda. Ang alam ko lang ay
nagiisa ka na lang sa uri mo. Ang lahat ay matagal nang nasira. Ikaw ang
nag-iisa at natitirang tao sa buong kalawakan. Ang unang taong buhay sa loob ng
halos isang milyong taon."
Tumunog ang orasan sa tabi ng sangkalan at maayos na
inilagay ng robot na si Pril ang lutong itlog sa ibabaw ng tinapay.
"Kumain ka." ang sabi niya.
"Ikaw, hindi ka ba kumakain? Ano naman ang istorya
mo?
Saan ka naman galing, Pril?" tanong ng lalaki.
"Isa akong Bargaan, Sitrarya. Bargaan ang uri ko at
Sitrarya naman ang tawag sa modelo ko. Hindi ako kumakain, Solo. Isa akong
antikong robot. Napakarami na ng mga nagsunurang henerasyon ng Bargaan at iba
pang klase ng Robot ang mas angat ng di hamak sa teknolohiyang taglay ko. Hindi
ako kumakain gaya mo, sa halip, kumukuha ako ng enerhiya mula sa Reca at
bahagyang nakakakuha sa araw. Gaya mo, wala na ring tulad ko, nag-iisa lang
ako. Dati ay umabot kami sa bilang na dalawampung bilyon, kapag luma na,
pinapalitan kami ng bagong modelo. Kami ay mga tagapagsilbi sa mga Quillians.
Ang mga Hiitanites ang naglagay sa akin sa sasakyan ng Reca. Sa aking paglikas,
wala akong malay na dala dala ang kautusan na protektahan ang punla, ang dala
kong restos, ala-ala ng sangkatauhan. Dati akong naninilbihan sa isang dakila
at mabuting Quillian, isang Hiitanite. Tinatawag siyang Apob. Sa simula ng
aking paglalakbay, ang alam ko'y sa sistema ng bituin ng Aoinis ako ipapadala.
Hindi ito gaanong malayo sa pinagmulan. Sa loob ng dalawangdaang taon ako ay
nanaliksik at inaral ang sistemang ito. Ako ay sumunod sa plano na ipinagutos
sa akin. Hanggang sa matapos ang misyon ko doon. Pauwi na sana ang sasakyan ng
bumuklat mula sa Reca ang isang sekretong mensahe, ang sekretong misyong
nakabaon sa pinakasulok ng diwa ng Reca. Ito ang tunay na pakay ng paglunsad sa
akin sa kalawakan.
Ang mensahe, ang
misyon ay ang iligtas ang Reca sa lahat ng nagnanais sumira dito sa kahit na
anong mangyari. Ako lamang at si Sliin ang pinadala upang hindi maging kahinahinala.
Kailangan kong dalhin ang punla sa di kilalang sistema ng bituin, sa ubod ng
layong bituin. Dito sa sistema ng Ares nakatandang tumungo ang Reca, sa
planetang ito, sa planetang Ares. May higanteng bituin ang tumatakip dito mula
sa direksyon ng ating araw kaya't di ito tanaw sa malayo, maliban na lang kung
sasadyain itong tutukan. Noong panahong yun, noong natuklasan ko ang sadyang
pakay ko, matagal nang mga patay ang mga nagpadala sa akin sa Aoinis.
Libo-libong taon ang paglakbay sa halos walang katapusang kaluwangan ng
kalawakan. Simula pa lang, ang sasakyang pangkalawakan na tinawag na Reca ay
nagpanggap lang na manunuklas ng malayong bituin.
Mula roon, mula sa star system ng Aoinis, binigay sa akin
ang destinasyon. Isang dwendeng bituin na nagtatago sa malaking bituin, na
malayo sa kayang abutin ng mga maaaring maghanap sa akin. Mula noong ilahad ang
sekretong mensahe, katulad ng utos sa akin, ang sasakyan ay nilagay sa tahimik
at palihim na kalagayan upang hindi matagpuan o makita ito sa kalawakan.
Naputulan ako ng ugnayan sa pinanggalingan. Hindi naglalabas ng signal ang
Reca, habang ito ay naglalakbay sa kalawakan sa kakaibang bilis ngunit patuloy
naman itong sumasagap ng signal. Dahil sa limitadong enerhiya naman, may mga
ilang beses sa bawat walong libong taon lang ako kung gumising sa pagkakapatay,
sa bawat pag-gising ko, kinukumpuni ko ang ano mang bahagyang nasira sa Reca,
binabalita sa akin ng diwa ng Reca ang mga bago at huling balita sa pinagmulang
sistema. Base ito sa mga nasasagap na signal ng Reca sa kalawakan.
Ang sasakyan ay naglakbay ng daan-daang libong taon. Sa
bawat pag-gising ko, napakarami ng pagbabago sa pinagmulan, nasasagap ito sa
mga nakawalang signals na malayang naglakbay sa kalawakan. Kaya't alam ko at
naitala namin ang mga kaganapan simula noong lumisan ang sasakyang itim mula sa
sistemang bituin, ang Solar System na tahanan natin. Bawat libong taon, ang
sistema ng komyunikasyon o uri ng wika kung gusto mo, na gamit sa pinagmulan ay
nagbabago, nagpapalit at nagiging kumplikado. Umabot sa punto na di sapat ang
teknolohiyang taglay ng Reca upang maintindihan ang kumplikadong signals.
Binantayan ang mga pagbabagong ito ni Sliin. Mula roon, sa kaluwangan ng
kalawakan, nalaman ko kung paano pinagpapatay at inubos ng mga Penttos ang mga
natitirang Quillians, habang sila mismo ay naglalaban sa isa’t isa. Ang lahi ng
pinagsilbihan kong mga amo, ang lahi ni Apob ay di na muling makikitang
nabubuhay at humihinga saan mang dako ka pumunta, gaya rin ng tao. Sila'y
naubos rin sa loob ng Apatnapu't apat na libong taong namuhay sa ilalim ng
sinag na araw. Makailang beses rin silang nagpabago-bagong anyo at kultura,
depende kung saang dako sila napadpad. Ngayon ay matagal na silang naglaho at
ubos na."
Huminto ang robot sa pagsalaysay sa mga nangyari sa
nakaraan. Tapos nang kainin ng lalaki ang itlog at tinapay. " Tara!",
ang bigkas ng lalaki. Bitbit ang baso ng tubig, sabay silang lumabas sa bagong
kabit na pinto ng asul na bahay.
"Gagamutin ko ang sugat na yan." wika ng robot,
habang hinahawakan at inaaral ang sugat ng binata sa kanyang kaliwang siko.
Pinanood ng lalaki mula sa tapat ng bahay ang robot na
umaakyat patungo sa itim na tore, sa Reca. Pag-akyat ng dalusdos, sa tapat ng
tore, kahanga-hangang natalon ng robot ang dalawampung talampakang taas ng
hagdan at umakyat naman siya mula rito patungo sa tuktok ng tore, doon sa bilog
na tila'y tahanan nito.
IV
Ang mabatong libis patungo sa tore na tinawag na Reca ay
may mahabang hagdan na, gawa ito sa pinagdikit-dikit na bato. Ito ang matyagang
ginawa at tinapos ng lalaki at ng Robot na si Pril sa loob ng tatlumpung araw.
Tinubuan na ng maiksing balbas ang lalaki at humaba ng bahagya ang buhok niya.
Pumangit ang dati'y makinis na balat sa mukha niya gawa ng pagkalantad nito ng
madalas sa labas. Suot niya ang maputlang asul na mahabang manggas na dati pa
niyang damit. Sila ay abalang gumagawa ng daang patungo sa hagdan mula sa asul
na bahay. Habang tinutulak ng lalaki ang karitong bakal, nagpahiwatig ito ng
pagkapagod.
"Pwede ba tayong huminto muna at pumasok ng
bahay?" sabay punas sa pawisang noo.
"Sige, pwede na muna ito," sabi ng robot.
"Ipagpatuloy na lang natin ito bukas."
Nakatirik ang araw at napakainit sa labas. Binuksan ng
lalaki ang Aircon. Dinampot niya ang itim na bola sa ibabaw ng TV na tinawag
nilang Magic8Ball at inalog ito. May lumabas na sulat sa puting tatsulok nito.
"Ano ito? Ano ang sinasabi?" tanong ng lalaki.
"Hindi ko rin maintindihan ang sinasabi ng bola. Ang
lahat ng lenguahe ng tao at pagsulat ay wala na, extinct na noong madiskubre
ang instruksyon, ang sangkap sa pagbuo ng Magic8Ball. Walang nakakaalam sa
kahulugan ng mga teksto na inilalabas ng bolang itim na yan ngunit isa yan sa
mga alam nating imbento ng sinaunang tao. Ang tiyak lang ay naglalabas ito ng
random na sagot sa mga tanong mo tuwing inaalog ito. Isang uri ng palipas oras
at munting libangan lang ng tao ang gamit nito."
Umupo sila sa harap ng mesa at nagsimulang asemubulohin ng
robot ang mga piyesa ng backgammon.
"Alam mo ba, naimbento ng mga tao ang larong ito,
libo-libong taon na ang nakalipas? Noong panahong natuto ang taong magtanim at
gumawa ng sariling pagkain. Bago pa man mabuo ng tao ang unang mala-taong robot
na nagsasalita at kumikilos na parang tao. Isa ito sa pinakaunang laro ng tao.
Minana ito ng mga Quillian kaya’t nailigtas ang paraan ng paglalaro nito."
"Talaga?" ika ng lalaki habang binobola niya ang
mga dice gamit ang kamay. Sa panahong ito, naiintindihan na ng lalaki ang
konsepto ng panahon. Marami-rami na rin siyang natutunan mula sa robot.
"Matanong ko lang, saan galing ang tubig natin, at kuryente ng ilaw?"
"May tubig sa ilalim ng lupa sa planetang ito.
Hinukay ko ito gamit ang mga binuong instrumento ng Reca noong wala ka pa. Kaya
narito sa ilalim ng lambak ang bahay dahil narito tayo sa pinakamalapit sa
tubig. Ang enerhiya, ang kuryente ay galing sa sinag ng araw na nainiipon sa
bubungan at pader ng bahay na ito. Ang enerhiya ay nakaimbak sa mga baterya na
pumapaloob sa mga dingding ng barracks. Ang enerhiya na nakaimbak ay ginagamit
natin sa lutuan, aircon, refrigerator at ilaw sa gabi."
Araw-araw, nadaragdagan ang natutunan ng lalaki sa
kasamang robot at bahagyang naiintindihan na niya ang nangyayari.
"Sa unang araw ko dito, hindi ko agad naramdaman na
mag-isa." wika ng lalaki. "Bakit kaya? Alam ko ang kahulugan ng
kaibigan. May naaalala ako sa isip ko, mga tao, nagtatawanan, nagsisikanta.
Pero malabo, hindi ko maaninag ang mukha nila. Parang masaya ako, sa gawa ng
ala-alang ito. Hindi ito tunay?"
"Kaibigan?" Tanong ng robot. "Gaya ng sabi
ko, artipisyal na memorya ang nasa isipan mo, ngunit may pagkakahawig sa
natitirang nalalaman natin tungkol sa uri ng nilalang, ang tao." May puting guhit na ilaw sa gawing bibig ng
pakurbang mukha ng robot ang tila'y umaalon depende sa lakas at tinang ng tono
nito kapag nagsasalita.
"Oo, kaibigan, kasama. Ikaw ba, kaibigan ba
kita?" ang dagdag ng lalaki.
"Ano ang mas gusto mo, ang katotohanan o ang
makapagpapasaya sa iyo?"
"Ang katotohanan.
Malungkot kasi ako, kahit pa naglalaro tayo ng chess, naglalaro
ng cards, nagkwekwentuhan, gusto kong makahanap ng katulad ko, isang tao na may
mukha. Gaya nila." tinuro ng lalaki ang mga larawan sa frame ng mga tao sa
pader.
"Sabihin ko ang totoo. Hindi ako tao na gaya mo. Wala
akong dugo, hindi ako nasusugatan at hindi nagkakasakit. Nagsasalita ako,
nakakasagot sa mga tanong pero sa likod ng madilim na mukhang ito ay walang
buhay. Ang tao ay may malay, alam niya sa sarili niya na siya ay narito, buhay,
nakapag-iisip ng kanyang pagtatapos, natatakot sa kaalamang balang araw siya'y
mamamatay. Isa lang akong komplikadong calculator, nakakapagsalita,
nakakapagbilang, kumikilos at maraming nalalaman. Parang Magic8Ball na
sumasagot sa tanong, nagbibigay ng opinyon pero walang buhay gaya ng mga bato
sa labas. Gaya ng calculator o Magicball, kahit buklatin mo ito'y madidiskubre
mong wala itong buhay at kamalayan. Nag-iisa ka pa rin, isa lang akong ilusyon,
kaibigan mo ngunit walang buhay, hindi gaya mo. Isang buhay na nilalang.
Nag-iisa sa iyong uri."
Hindi ito maproseso ng lalaki sa kanyang isipan, hindi
niya maisip na posible ang nilahad ng robot sapagkat tugma sa tao ang kilos at
pananalita nito.
Tumayo siya at lumapit sa magkakadikit na picture frames
sa pader. Tinitigan niya ang larawan ng isang Asyanong pamilya na may isang
babaeng anak."
"Dati silang buhay?"
"Oo. Matagal na panahon na, sa planetang Earth. Ang
planeta na pinagmulan ng lahat."
"Ano ang kwento sa kanila?"
"Walang nakakaalam. Nakuha ng mga Penttos ang mga datos
na yan sa sa isang sasakyang pandagat na sira at luma. Binuo ng Reca ang
larawan at frame mula sa mga lumang datos na ito."
"Ayaw kong maglaro ngayon, ayos lang ba?" tanong
ng lalaking nakasimangot. Nilapag niya ang pulang dice.
"Ano man ang gusto mo." sagot ng robot.
“Nakakalungkot lahat ng kwento mo, lahat ay luma at
naglaho na.”
Naglakad at tumungkod sa likuran ng luklukan ang lalaki at
nagtanong, "Ano ang mga Penttos? Sino sila?"
"Ipapakita ko sa iyo. Umupo ka" umupo naman ang
lalaki sa harap niya.
V
May liwanag na puti, hugis singsing ang gumuhit sa mukha
ng robot na si Pril. Pagkatapos ay naging diretso at nakatayong parihaba ang
hugis. May imahe ng higanteng reptilya ang nabuo sa mukha niya. Nanlaki ang
mata ng lalaki sa nakitang lumabas na imahe sa mukha nito. Biglang kumilos ang
imahe na tila hologram palabas ng mukha ng robot.
Lumabas rin ang gumagalaw na higante at mukhang halimaw na
aso. Umiilaw ang mga mata nito. May tusok tusok na balahibo sa likod at halos
kasintaas ng tao ang halimaw. Pinakita rin ang parang dragon na nilalang, may
pakpak at umiilaw ang mga mata at mga lumiliwanag na bakas ng hugis bilog sa
balat nito. May mga ibong lumiliwanag ang balahibo.
"Ang mga ipinapakita ko ay mga tunay na nilalang,
nilalang sila ng tao sa iba't ibang kadahilanan gamit ang makalumang paraan ng
pagtuklas sa henetiko. Tinawag ang mga nilalang na itong Diods. Karamihan sa
dahilan kung bakit sila ginawa ay may kinalaman sa alitan, sa digmaan at sa mga
palakasan ng mga makapangyarihan. Sila ay ginagamit bilang makabagong armas
pandima na kayang tukuyin sa saktong detalye ang target na papaslangin. Ang iba
sa mga dambuhalang nilalang ay ginagamit naman bilang paraan ng transportasyon,
ang maliliit ay taga-linis ng mga daluyan ng tubig o dumi. Sila rin ang umubos
sa lahat ng nilalang na tinatawag na daga, na nagtatago sa mga higanteng tubo.
Pinaguubos ng mga ito ang lahat ng natitirang natural na kahayupan at halaman
sa kalupaan. Hindi sila napigilang magbagong anyo at magparami."
Patuloy na nagpapalit-palit ang mga imahe sa mukha ng
robot. May mukhang ahas na sobrang laki, malikot at may napakahabang pangil.
May napakaraming ibon na may kaliitan ngunit dumudura ng asido. May maliliit na
isda ang nawawala, nagiging invisible at naglalabas ng malakas na kuryente sa
katawan nito.
"Sa panahong ito, may iisa nang gobyerno na
namamahala sa lahat, sa mundo at sa labas. Wala na ang namamatay sa sakit at
katandaan." patuloy na naglahad ang robot. Napalitan ng mga imahe ng tao
ang nasa hologram. "Hindi napigilan ang agresibong mga tao na nagnanais mamuno
sa lahat na gumawa ng mga nilalang na may dalang peligro sa kabuhayan ng tao.
Naging mapanira ang mga Diods. Ang mga hindi agresibo ay inuubos ng mga mas
agresibo. Gumawa ng mga mas brutal na mga robots ang tao bilang proteksyon at
tagabantay laban sa Diods, ngunit kinakaya at nauutakan lang ito ng mga
nilalang. Kahit ang nga metal nilang katawan ay di kinaya ang mabibilis at
maliliksing Diods. Ang mga Diods ay kinayang pagbutihin ang sarili, sila'y
nagbabago ang anyo at mas bumibilis, lumalakas at nagiging matagumpay sa
pagwasak sa mga gawa ng tao. Nabigo ang mga pinuno ng mga tao sa pagsupil sa
pesteng kanila ring ginawa hanggang sa maging desperado sila at bumuo ng
nilalang na mas matalino sa tao, base sa henetiko ng tao, ang unang bersyon ng
Penttos. Nilalang na mataas, matalino at maliksi. Sila ang inaasahang sasalba
sa Planeta at sangkatauhan."
Pinakita sa hologram ang mukhang taong nilalang na may
mahabang ulo at may magkahiwalay na naglalakihang mata.
"Sa umpisa'y sanay silang maging masunurin. Nakabuo
sila ng mga mekanikong mga nilalang, mga robots na angat sa teknolohiyang gawa
ng tao. Sila mismo ay sinasabak sa digmaan, sila mismo'y namuno sa mga ginawa
nilang robots upang ubusin ang mga nilalang na Diods. Kapag matagumpay, sila ay
luluhod sa harapan ng mga panginoon nilang mga tao, pupurihin. Pagkatapos ay
ipapasok sila sa loob ng higanteng gusali kung saan lihim na naghihintay ang
katapusan nila. Pinapa-asa silang ireretiro kasama ang mga kauri nila kung saan
may babaeng Penttos na naghihintay sa kanila. Walang nakakaalam kung paano sila
pinapaslang matapos gamitin. Hindi nila kilala ang isa't isa, ang kapwa o kauri
nila. Wala silang malay na napakarami sa hanay nila ang pinapatay ng mga
sariling pinuno nila na pinagsilbihan. Sila ay matalino ngunit bulag sa
katotohanan. Gumagawa lang ang tao ng mga lalaking Penttos na hindi maaaring
magparami. Wala silang pangalan, mga numero ang tawag sa kanila."
May imahe ng dalawang Penttos ang lumabas sa hologram.
"Sila ang binansagang Gemini. Matapos nilang
makipagbakbakan sa Diods na tinawag na Trinokus, sila ay napatibong at nahuli
ng nilalang. Isang ampibyan si Trinokus. Nakakapagsalita ito at mula sa barkong
pandigma na kanyang tirahan, ibinulgar niya ang katotohanan. Ang mga Penttos ay
ginagamit lang at pinapatay ng mga tao kapag sila ay nagwagi sa kanilang misyon.
Hindi sila dinadala sa lugar kasama ng mga kapwa nila salungat sa kanilang
inaasahang gantimpala. Pinakita ng nilalang na ampibyan sa pamamagitan ng
hologram ang ginagawang pagpasok sa lagusan ng mga Penttos na natapos sa
serbisyo. Ang mga Penttos ay pinapatulog hanggang mamatay at tinutunaw
pagkatapos.
Tinuro ng nilalang na Trinokus ang paraan ng paggawa ng Penttos gamit ang henetiko nito. Sila ay pinalaya ng ampibyan at nagtagal sila ng ilang araw kasama ito.
Mula roon, ang dalawang Penttos ay pinakawalan ng nilalang
na Trinokus. Umuwi sila sa kanilang kanya kanyang mga amo, ngunit imbes na
kinupkop, sila ay pinarusahan sa pagiging talunan. Nais ng kanilang mga pinuno
na mapatay nila ang ampibyan ngunit nabigo sila sa kanilang misyon. Dahil sa
sinabi ng ampibyan na Trinokus, hindi na sila napalagay. Parehas silang
nakatakas sa tiyak na kamatayan at pinagpapatay nila ang mga taong bumihag sa
kanila. Nakaprograma ang mga lumilipad na robot nila na iligtas sila sa piitan.
Naging alamat ang imposibleng pagkakatakas nila sa bantay saradong piitan.
Maging ang ibang Penttos ay hindi sila binali-wala, hinarang sila nito ngunit
ipinaglaban nila ang kanilang kalayaan. Tumalon sila sa napakataas na tore at
bumagsak sa tubig. Nagkita ang dalawang gemini na Penttos sa isang abandonadong
barko. Bitbit nila ang punlang nakaw galing sa laboratoryo ng mga tao, mula
dito binuo nila ang unang Penttos na may magkakaibang kasarian."
Lumabas sa hologram ang imahe ng mga digmaan habang
naglalahad si Pril.
"Sila ay nagparami at nag-aklas. Mabilis nilang
napatalsik sa pwesto ang Hari ng mundo.
Ito ang katapusan ng paghahari ng tao. Napakarami ng bilang ng mga
namatay. Bawat dako ng daigdig, walang tigil ang bakbakan. Napatay man ng tao
ang gemini, silang Penttos naman ang nagwagi sa huli.
Sa umpisa, nagkaroon ng pag-asa ng kapayapaan. Maraming
alipin ang pinalaya, tao man o Penttos. Naging kolonyal ang mga Penttos, kung
nasaan sila, naroon din ang mga tao. Sa planetang Mars, ang mga Penttos ay
nagpalit itsura na angkop sa nipis ng hangin at hina ng gravity nito. Pinalitan
nila ang sangkap ng hangin ng Mars. Matapos ang ilang siglo, nagkaroon ng
alitan sa pagitan ng mga tao at Penttos. Mula sa Mars, sa planetang tinawag
nang So-el, binuo ng tao ang mga Quillians upang protektahan sila nito sakaling
lusubin sila ng mga Penttos."
Napalitan ang imaheng nilalabas ng hologram ng mukhang tao
na may kahabaang ulo at maliit na mata.
"Sa umpisa, ang mga Quillians ay simpatiko at tapat
sa mga tao. Sila ay dinesenyo upang maging kakampi ng tao. Sila ay may
kakayahang maawa at lumungkot gaya ng tao. Hanggang sa magkaroon muli ng
malawakang digmaan. Sa panahon na ito, matagal nang sira ang planetang Earth na
tahanan ng lahat ng tao. Naging nuclear wasteland ang buong planeta, ang
temperatura nito ay higit pang maiinit sa planetang Venus. Organiko man o
mekaniko ay hindi mabubuhay dito. Ang mga nilalang ay umaasa sa mga artipisyal
na kolonya na nakapalibot sa Solar System. Mga kolonyang binuo ng mga mekaniko
para sa mga Penttos o Quillians na pinagsisilbihan nila."
Biglang namatay ang palabas at naging blankong itim ang
mukha ni Pril.
"Bakit ako mahalaga sa mga Quillians? Apob ang ngalan
ng nagsugo sa iyo, sino siya, Pril?"
Hindi sumagot ang robot at hindi kumikilos.
VI
Ilang minuto ang nakalipas at wala pa ring pinapakitang
senyales ang robot na si Pril. Bigla lang itong huminto ng walang sinabi.
Nagtaka ang lalaki sa nangyayari. Ilang saglit lang limitaw ang tuldok na bilog
sa gitna ng madilim na mukha ng robot. Tumayo ito at lumabas sa pintong
salamin.
Mabilis siyang sinundan ng lalaki. "Sandali, hindi mo
sinagot ang tanong ko." bigkas ng lalaki habang hawak nito ang braso ng
robot. Ngunit kahit anong hatak at sigaw ng lalaki, hindi siya pinapansin nito.
Diretso itong naglakad ng hindi namamansin at umakyat sa hagdan na bato ng
lambak na kanilang tinatag. Mula sa hagdang bato, bumitaw ang lalaki at
pinanood ang robot sa pag-akyat nito. Tumalon ang tulalang robot para abutin
ang mataas na hagdang gawa sa metal ng toreng itim. Mula dito, binuhat niya ang
sarili at umakyat patungo sa modulang itim ng napakabagal.
Muling nawala ang robot pagpasok niya sa Reca. Napasabunot
sa sariling buhok ang lalaking lito sa nangyayari na pinanonood siya mula sa
hagdan.
Matapos ang isang araw, nagulat at napa-atras ang lalaki
ng magising ito sa kanyang kwarto na nakatayo sa harapan niya ang robot.
"Magandang umaga, Solo." sabi ng robot. May
kulay asul na naglalarong liwanag sa mukha nito.
"Anong nangyari sa iyo?" tanong ng bagong
gising.
"Binalik ako ng diwa ng Reca na si Sliin. Ang
matandang sistemang taglay ng katawan ko ay nagbagal at biglang huminto,
kinailangan ko ng pagkumpuni ng Reca. Sumagap rin ako ng enerhiya. Halika,
kumain ka muna."
Nakahanda sa lamesa ang prutas na pakwan, gatas at nilugaw
na obena. Umupo ang lalaking nakasuot ng pajama. Mainam nitong kinain ang
inihanda sa hapagkainan.
"Matanong ko lang, Pril." sabi ng lalaki,
"Bakit sa pagkain, napakarami ninyong alam? Hindi ba't sinabi mong ang mga
nakaraan ng tao ay halos ubos na?" nakatitig siya sa mapulang pakwan sa
hapag.
Humagikgik sa galak ang robot. May guhit na pula at dilaw
na hugis paalon sa mukha nito, at siya'y nagsalita, "Oo, tama ka. Kung may
ala-ala ang sinaunang tao sa kanyang nakaraan, ang pinakamaraming data na meron
kami ay tungkol sa mga pagkain nila. Ngunit.."
Pinatid ng lalaki ang binibigkas ng robot, "Bakit
hindi mo alam na gugutumin ako at iniwan mo ako? Iniwan mo ulit ako
kahapon."
"Patawad kahapon, Solo. Hindi na kita ulit
pababayaan. Nagkamali ako kahapon, hindi ko na pwedeng gamitin ang hologram ng
pasirang sistema ng katawan ko. Tungkol sa pagkain naman, marami sa kinakain mo
ay minana ng mga unang henerasyon ng mga Penttos, kaya't naka-tala sa Reca ito
ng may kasiguraduhang babagay sa sikmura ng isang Solo. Sa loob ng libo-libong
taon, nagbago, nagpalit ng pamamaraan ng pagkain ang mga organiko. Ubos oras
ang pagkain, sa kanila, bawat oras sa kanila ay mahalaga. Hindi gaya sa tao na
lulon sa iba't ibang pamamaraan ng paghanda ng pagkain. Maraming taon ang
lumipas, itinuturok at diretsang ipinapasok ang mga mineral, bitamina at iba
pang kailangan ng katawan ng mga Penttos. Ang paraan ng pagkain ng mga
sinaunang tao ay nalimutan sa loob ng daan-daang libong taon. Ito ang dahilan
kung bakit wala akong alam sa ugnayan ng pagkain sa katawan mo sa kabila ng
iba't ibang uri ng pagkain ang naibalik ko at pinalitaw. Wala akong ensayo patungkol
dito sa loob ng Reca, maging sa akin ay sinekreto ito, biglang binigkas ng Reca
ang misyon ko noong nasa malayong bituin na ako. Misyon na palitawin ka at ang
mga kailangan mo upang mabuhay. Ikaw ang unang tao na nakita kong kumain."
Habang kumakain ang lalaki, nagbukas ito ng usapan,
"Nanaginip ako kagabi," wika niya, "May nakita akong batang
babae na nakatayo sa labas at nang habulin ko siya, bigla siyang nawala. Pril,
gusto kong may makasamang tao na gaya ko. Ang panaginip ay parang bakas ng
aking ala-alang itinanim lang ng Sliin na iyong tinukoy. Kaibigan kita, pero,
ganito na lang ba ako at mag-isa? Pwede mo ba akong bigyan ng kasama? Bakit nga
ba hindi ako naging bata? Paano ako namulat dito na mataas na, hindi maliit
gaya ng bata? Gaya ng mga nasa larawan."
"Iyan lamang ang instruksyon na dala ko, walang iba. Ikaw
lang ang dala ng Reca. Ikaw ay lumitaw sa pentagonong kristal na buo,
binatilyong lalaki na, na may memorya ng matandang tao, hindi ka naging bata.
Hindi ko alam kung bakit. Kung ikaw ay bata, baka naglayas ka, naligaw kapag
nagpasyang maglakad sa malawak na disyerto ng mag-isa. Ang instruksyon ng
restos na dala ng Reca ang inilabas nito at binuo. Ano man ang dahilan, hindi
ito malinaw. Hindi ko masasagot ang lahat ng tanong mo ngayon."
Naglakad ang robot at humarap sa mga larawan sa pader.
"Susubukan kong gawin ang lahat ng makakaya kung mabibigyan kita ng kasama."
ang sabi niya.
Makaraan ang maraming oras, silang dalawa ay nakaupo sa
labas at nakatingala sa langit, sa mga bituin at sa bilog na buwan. Madilim na
sa labas at malamig ang simoy ng hangin.
"Alam mo ba kung bakit natatangi ang plantetang ito?
Ang Ares?" wika ng robot. "Isa itong perpektong planeta para itago
ang punla, dito, ikaw ay mabubuhay. Hawig nito ang gravity ng Earth, ang
tahanan ng lahi mo. Ang hangin, matapos baguhin ng Reca, bumagay sa
pangangailangan ng katawan mo. Kahit ang buwan, ang Trewui, ay hawig sa layo ng
buwan ng Earth. Ngunit ikutin mo ang planetang ito, puro disyerto at bulkan ang
makikita mo. May pagkakahawig sila sa planetang pinagmulan ngunit ang gaya ng
tamang hangin na kailangang baguhin at mga gaya ng bakterya ay kailangan pang
ilagay."
May isang maliit na puting piraso ng lumulutang na bagay
ang dumaan sa kalawakan malapit sa buwan.
"Nakita mo yung maliit na puti na yun?" tinuro
ng robot ang dumaan na puting bagay na hugis bean malapit sa buwan. "Iyon
ang Ledro, isang asteroid na nahuli ng orbit ng Ares. Dalawa ang umiikot sa
Ares, ang buwan na Trewui at ang Ledro. Diyan sa Ledro nakadapo, nakatago ang
Reca sa loob ng labing tatlong libong taon. Sa panahong iyon nasagap ng Reca
ang balitang naubos lahat ng Penttos. Sila rin ay ubos na gaya ng tao at mga
Quillians na libo-libong taon nang naglaho.
May mga maliliit na mekanikong nilalang, mga mukhang
insekto, ang nagpaparami at pumatay sa mga organiko. Saan man ito galing ay
nananatiling misteryo. Ang kahuli-hulihang kolonya ng Penttos sa star system ng
Proxima Centauri ay inabutan ng mga mapinsalang mga mekanikong mga insektong
ito. Ang paparating na sasakyan sa kanila ay pinamugaran ng mga insektong ito
na pumapatay ng mga organiko. Huli na nang mabalitaan ng kolonya ang pagkaubos
ng lahi nila sa pinagmulang Solar System nang makarating ito. Ang nagpadala ng
babala ay mga robot, mga may mas mataas na taglay na teknolohiya sa akin.
Sinubukan nilang iligtas ang lahat ng Penttos ngunit bigo sila. Inubos nila ang
bawat isang insektong metal sa bawat panig ng magkakadikit na mga bituin. Nang
matapos nila itong ubusin, marami sa kanila ay kusang nasira, sapagkat ang
robot ay nabubuhay sa kanilang layunin o kadahilanan ng pagkagawa. Kung walang
dahilan ng kanilang pagparito, hindi nila kailangang manatili pa at magpatuloy.
Gaya ng sabi ko, ang mga robot gaya ko ay walang tunay na buhay, walang kamalayan.
Marami kaming kayang gawin, kayang gayahin ang kilos ng mga organiko gaya ng
tao, ngunit sa totoo ay walang malay. Hindi tunay na buhay. Ako ay nanatiling
buo at nagsasalita sa loob ng isang milyong taon dahil sa aking misyon."
"Ano ang itsura ng mundo, ng Earth?" patid ng
lalaki, habang nakatingin ito sa katabi.
"Hindi ako sigurado. Umalis ako sa pinagmulan na ang
balita sa Earth ay nasusunog sa init, napalibutan ng peligrosong radiation.
Hindi na ito pwedeng tirhan.
Ang sabi nila, ang Earth ay ang pinakamagandang planeta sa
lahat. Ang tao ang sumira dito. Sinasabing ang mga tao ay naging mapang abuso
rin sa kapwa nila. Napakarami ng masalimuot na kaganapan sa kasaysayan nila, sa
kamay ng mga nasa kapangyarihan. Ang lahi ng Penttos ang huling lumikas sa
Earth, hanggang maging planeta ito na hindi pwedeng tirhan. Ang agawan ng
kapangyarihan ang ugat ng pagkasira ng sariling tahanan nila ang bughaw na
planetang tinawag na Earth. Dahil sa mga kasalanan umano ng tao sa mga nilalang
ng Earth, maging sa mga nilalang na ginawa nila gamit ang agham, sila ay
pinarusahan ng tadhana. Apat na libong taon silang inalipin dahil dito. Walang
kailangan sa mga tao ang mga Penttos, para sa kanila, hindi na kailangan pang
mabuhay ng mga tao sa panahon ng kanilang paghahari ngunit magpapasaya sa
kanila ang maparusahan ang lahi ng mga tao dahil sa bintang nilang pagsira ng
tao sa mundo."
Humikab ang lalaki at nagsabing, "Matutulog na
ako." sabay tapik sa balikat ng robot. Pansin ang lungkot sa mukha nito.
"Sige magpahinga ka." sabi ng robot.
"Sandali," pahabol ni Pril, "Solo, ang mga
ito ay mga kasaysayan ng nakaraan. Mahalagang malaman mo ang lahat ng ito sa
akin. Sige, magpahinga ka na." Nanatili sa labas ang robot.
VII
Umaga na naman. Gumising ang lalaki at dumiretso sa
kusina, napatalon siya sa gulat ng makita ang batang babaeng blonde ang buhok
na nakaupo sa mesa. "Hello!" ang sabi sa kanya at ngumiti ito.
Nagulat at napasigaw ng todo ang lalaki. Kumaripas siya ng
takbo patungong kwarto, sinara ang pinto at sa sulok ng kama ay nagsisisigaw.
Binuksan ng robot ang pinto ng kwarto. May hugis tatsulok
na berde sa mukha nito at siya'y nagsalita.
"Pasensya na, di kita gustong takutin. Ako ang gumawa
ng imaheng iyon sa isip mo. Hindi yun tunay. Patawad! Patawad!"
"Ano ka! Hindi tama na bigla kang tatayo sa harap ko
paggising o kaya may palilitawin kang batang babae sa kusina. Magsabi ka naman!
Tinakot mo ako ng todo. Saan galing yun? Paalisin mo siya.
Pano mo nagawa yun? Sandali, ano ito?"
Inalis ng lalaki ang dalawang hugis bilog na malinaw na
nakadikit sa gilid ng bawat mata nito. Siya ay namumula at nanginginig sa
takot. Kinuha ng robot na si Pril ang mga ito sa kanyang kamay.
"Patawad. Hindi ko alam. Akala ko'y matutuwa ka. Nais
mong may makasama, sabi mo. Patawad. Ang inalis mong yan, diyan galing ang
ilusyon na nakita mo. Yung bata na nakita mo ay ilusyon lamang, hindi siya
nananakit." sagot ng nakayukong robot.
"Hindi ko rin alam na matatakot akong makakita ng
tao, hindi ko alam talaga." bulong ng lalaki. Siya ay nakasiksik sa dulo
ng kama. Siya ay kinakabahan pa.
Nagdikit ang kamay ng robot at nagsalita, "Halika,
may ipapakita ako sa iyo. Pasensya na ulit, hindi ko alam ang lahat. Ang
malinaw na nodes sa iyong mata ay nakalaan upang sanayin ang mga Solo sa
palapit na pagkikita nila sa lipon ng mga tao. Kaya nitong bumuo ng ilusyon na
makikita ng mata mo. Hindi mo ito kailangan at pinagamit ko sa iyo, patawad.
Halika, tayo nang lumabas dito, may ipapakita ako."
Nakatitig lang sa robot ang mata ng lalaking may bakas pa
rin ng takot. Sinuot ng lalaki ang pantalon, sinuot niya ang damit na may
manggas at kwelyo.
"May mga lupon ng mga tao, gaya ko?" tanong ng
lalaki.
"Solo, patawad, iyon ay ang orihinal na plano.
Nag-iisa ka lang at wala tayong makikitang ibang Solo sa kalawakan. Ang ibang
modula ay winasak ng mga tagagalugad na mga robot, ang Reca lamang ang
natitirang sasakyang bitbit ang punla. Natitiyak ko ito dahil sa mga signal na
nasagap ng Reca, mga balita ukol sa pagkasira ng ibang sonda."
Lumabas sila diretso sa gawing paitaas, sa toreng itim.
"Huwag kang mabibigla sa ipapakita ko, sinunod ko
lang ang hiling mo." wika ng robot.
Habang umaakyat pa lang sa batong hagdan, tanaw na ang ulo ng isang
maputlang kayumangging kabayo sa malayo.
"Tunay ba yan?" tanong ng lalaki. "Kabayo
nga ba ang nakikita ko?"
"Oo," sagot naman ng Robot. "Mula sa
panahon ng mga tao. Ginawa ng Reca para sa iyo."
Habang papalapit na sila sa tuktok ng lambak, nakita naman
sa kanilang pwesto ang kabayong robot, kabayong gawa sa metal. Nakatago ang
katawan nito sa likod ng silindrikong pilipit na pundasyon ng Reca.
"Teka, robot na kabayo? Bakit?" tanong ng
lalaki.
"Maglalakbay tayo, hindi ka na maiinip sa
pagkakakulong sa bahay mo. Isasama kita."
May mahabang lubid sa paligid ang halatang ginamit sa
pagbaba ng dalawang kabayo.
Hinipo ng lalaki ang balahibo ng maamong kabayo. "Ito
ang unang beses kong makahawak ng kabayo, pero para bang nakahawak na ako dati.
Sandali, may makikita ba tayong kakaiba? Doon sa
malayo?"
Patuloy na hinihimas ng lalaki ang balahibong kulay krema
ng kabayong nakatindig. Niyakap niya ito at pinakinggan ang puso nito.
"Sa kalayuan," wika ng robot, "may aktibong
bulkan sa kalayuan, kailangan nating makita ito. Makakapinsala ito kung sakali,
kailangan kong makalapit at aralin ang posibleng mangyari. Tatamaan ang Reca at
ang barracks kung sakaling puputok ito."
"Bakit tinatawag mong barracks ang bahay natin?"
tanong ng lalaki.
"Yung bahay? Lahat ng nakasaad sa Reca ay ang mga
natitirang kaalaman tungkol sa kabihasnan ng tao, ang bahay-tao ay tinatawag na
barracks ng mga Quillian dahil ito ang tawag ng mga tao sa tirahan nila sa mga
huling taon ng kanilang pakikipaglaban sa karapatan nilang mabuhay. Barracks
din ang tawag sa mga kulungan nila kung saan sila inalipin."
Ipinatong ng robot ang silya ng kabayo at hindi ito
pumalag. Sumipa lang ng bahagya ang kabayo. Sinilip din at sinuri nito ang
bawat metal na herradura nito sa apat na paa.
Tinuruan niya ang lalaking sumampa sa kabayo.
"Humawak kang mabuti sa tali." bilin ng robot.
Sumakay naman ang robot sa metal na kabayo nito, hawak
niya ang tali na umuugnay sa kabayo ng lalaki. Tinuruan niya ang lalaki sa
pagpapatakbo ng kabayo nito sakaling maaksidenteng makalas ang kanilang tali.
Inabot ni Pril ang isang bag na itim. May lamang, kumot, unan, tent at damit.
May bananacake, mansanas, tinapay at kantina ng tubig. Inilagay ng lalaki sa
kanyang likod ang bag.
Diretso silang nagtungo sa gawing timog-silangan paikot ng
maliit nilang lambak, sa bahaging likuran ng bahay nila, sa itaas ng munting
burol.
Sila ay nakalayo na sa pinanggalingan. Kapit na kapit ang
lalaki sa tali. Di naman nito mapigilang lumingon pabalik. Hindi pa niya
sinubukang tahakin ang kabilang landas na mas mahirap lakarin gawa ng mas
naglalakihang mga bato rito.
Sa di kalayuan, sa pinanggalingan nila, may dumaan na
hanging may dalang alikabok kaya't natakpan ang palatandaan nitong
"kulisap" sa malayo, sa kabilang panig ng lambak.
"Pril, kung hindi tayo titigil, kung kaya ng mga
kabayo at diretso tayong maglalakbay, hindi tayo hihinto, saan tayo
makakarating?" tanong ng lalaki. "Hanggang saan ba tayo pupunta?
Kailan ba ang balik natin?"
"Ang buong planeta ay disyertong mabato, mahaba at
matagal na panahon ang hihintayin mo bago mo mararating ang dulo, ang Reca,
kapag naikot mo ang planeta. Ikutin mo man ang planetang ito, walang ibang
makikita kundi disyerto at ang nasa dulo ay balik sa Reca."
"Ganun ba? Walang kakaiba? Sa lahat ng dako, puro
ganito?"
"Oo, Solo. Nagbabago lang ang lalim at taas ng lupain
ngunit ang lahat ng tanawin ay disyerto. May alam akong kweba sa madaraanan
natin, doon kayo magpapahinga. Tiyak na matatagalan tayo bago makabalik. Tiyak
akong sapat ang pagkaing bitbit mo."
Mabilis na nasanay ang lalaki sa pagkakaupo sa likuran ng
kabayo.
"Sino si Apob? Tinanong ko ito sa iyo bago ka
huminto. Naaalala mo ba? Sino siya? Siya ang nagdala sa iyo dito. Ang sabi mo,
siya ang nagsugo at napasa ng misyon mo." tanong ng lalaki.
"Si Apob ay Quillian. Iniligtas niya ako at binigay
niya ang misyon ko, ikaw. Isa siyang pinuno ng mga Quillian sa Hiitan."
"Sino ulit si Yuki Alrasing? Sino siya?"
"Si Alrasing ay isang Quillian, Solo. Isang maawaing
pinuno ng isang kolonya. Namuhay siya libo-libong taon bago ang panahon ni
Apob. Nakatira niya sa planeta ng So-el. Si Apob ay namuhay sa buwan ng Saturn,
sa Zad-ark. Si Yuki Alrasing ay nabuhay sa panahon ng mga huling tao. Pinalaya
niya ang mga tao na noo'y mga alipin at inaabuso. Pinanalo niya ito sa lipon ng
mga pinuno sa sistemang bituin ng pinagmulan. Sa panahong ito, matagal nang
lagas ang ano mang bakas ng kadakilaan ng kabihasnan ng tao. Namuhay ng payak
sa isang kolonyang malaya ang mga tao. May mga naniniwalang si Alrasing ay
disipulo ni Ares, naniniwala rin siya sa bersyon ng kasaysayan ni Ares--ang tao
ang gumawa ng mga Penttos at Quillian."
Naging patag ang dinaraanan nila. Nauuna ang kabayong
metal at robot na si Pril.
"Yung restos, sonda, pareho lang ba ito? Ang Reca na
lang ba ang nag-iisang may dala nito?" tanong ng matanong na lalaki.
"Ang resto ang bariles na pinaglalagyan ng punla. Ito
ang nagdadala ng instruksyon ng pagbuo ng tao, ng Solo gaya mo. May limampu
nito ang natira. Inilunsad ang Reca, pinalipad palabas ng sistema patungong
sistema ng Aoinis ng nag-iisa. Wala nang gaya mo, ng Reca, ng restos na dala
nito. Ang limampung restos ay hindi na natunton, pinaniniwalaang sinira ng mga
naghahanap rito, ikaw ay nag-iisa. Ang resto ay hugis pahaba at kulay itim.
Hugis espada itong walang hawakan. Nakabaon ito sa pentagonong kristal ng Reca
kung saan binabasa ang laman nito. Doon nakasulat ang pagbuo sa gaya mo. Ang
sonda naman ay sasakyang pangkalawakan na pinaglalagyan ng restos, ang mga tao
ang bumuo nito, libo-libong taon ang nakaraan bago ang panahon ng Quillians. Sa
Earth mismo galing ang noo'y libo-libong bilang ng sonda."
"Kakailanganin mo ang mga ito para mabigyan ako ng
kasama."
"Tama ka, Solo. Mag-isa ka dahil dito, dahil ikaw
lang ang natitira sa lahing organiko. Wala na, extinct na ang mga lahi ng tao,
Penttos, at Quillians. Ang Reca ang nagiisa at natirang tagapangalaga ng
punla."
Umabot ang tanghali at tumirik ang araw. Kumuha ng takip
sa ulo ang lalaki. Hinugot niya ang lalagyan ng tubig sa bag. Biglang huminto
ang kabayo. Napansin ito ng robot at humarap ito sa kanya. Napalitan ng tatlong
guhit na pahalang ang ilaw sa mukha nito at nagsalita. "Dahan dahan ka
lang sa tubig, kakailanganin mo iyan hanggang pagbalik."
Napahinto sa paginom ang lalaki. Sa isang kakaibang
pabiro, sinubukang kausapin ng lalaki ang kabayo.
"Hindi mo mapapasunod sa salita iyan," sabi ng
robot, sabay natawa ito. "Kailangan mong isipa ng bahagya ang paa mo para
sumulong kayo."
Sumunod ang lalaki, sinipa niya ng bahagya ang kabayo sa
tyan nito. Tumakbo sa gulat ang kabayo, kasunod nito'y agad na nahulog sa
niluluklukang silya ang lalaki. Nabitawan ang taling hawak ng robot sa biglaang
takbo ng kabayong nagulat.
"Hoy, ayos ka lang ba?" ika ng robot.
"Nagagalaw mo ba katawan mo?"
"Ayos lang. Pril." pagsagot ng lalaki sa
pagkakadapa. Mabilis na tumakbo ang robot na kabayo, hinabol ang kabayong
nakawala. Sa loob ng dalawang minuto, nahablot ni Pril ang tali ng kabayo.
Nagpupumiglas ito at tumatalon, nakatitig ang takot na nilalang sa kabayong
bakal na may matang matingkad na pula. Kaunting sandali pa, huminahon at
tumahan ang kabayo. Lumapit sila sa lalaki. Napansin ng lalaki ang gasgas sa
paa ng kabayo. Tinapik niya ito sa leeg na tila'y binubulungan ito at sumampa. Habang
sinusuri naman ng robot na si Pril ang kanyang metal na kabayo.
Patuloy silang naglakbay. Paminsan minsan, nagpapalit sila
ng sinasakyang kabayo. Sinasanay siya ni Pril sa pagkakabayo sa dalawang uri ng
kabayo.
Ilang oras pa, narating nila ang malaking yungib na
tinukoy ni Pril.
"Dito ka matutulog. Maglalatag na tayo." Sabi ng
robot. May lumitaw na kulay ube at hugis pentagonong liwanag sa mukhang madilim
nito.
Sa bukana ng kweba naglatag ng mahihigaan ang lalaki.
Mukhang pagod na siya at nananakit ang mga binti.
"Napakadilim dito." reklamo ng lalaki.
"Malamig."
Mag-gagabi na, tinatali ng robot na si Pril ang mga kabayo
sa isang pahabang bato na ubod ang laki. Hindi naman tumitigil sa pag-iwas ang
kabayo sa kabayong gawa sa metal. May kinuha siyang maliit na bag na nakasabit
sa kabayong robot. Inilabas ni Pril ang laman nito, pumasok siya sa dumidilim
na kweba bitbit ito. May bilog na parang flashlight sa mukha niya ang
nagsilbing ilaw niya sa yungib. Gumawa siya ng maliit na hukay at isinilid ang
tatlong pawang bolang metal na hawak niya. Lumiwanag ito ng kulay puti at
naging mainit ang paligid ng tatlong bola. Sinabuyan ng buhangin ng robot ang
tatlong ilaw. Umusok ng bahagya at mula rito may hologram na lumitaw na tila'y
apoy. Ito ang nagsilbing sulo nila na nagbibigay init sa malamig na klima.
Pinapanood ng lalaki ang pekeng apoy. Nais niyang itanong
kung paano ito nagawa ng robot ngunit hindi niya itinuloy. Sawa na rin siya sa
walang tigil na tanungan sa napakaraming kumplekadong bagay at irita na rin sa
pagkakabisado sa mga kaganapan sa nakaraang matagal nang nawala. Ngunit gayon
pa ma'y hindi napigilang maglahad ng robot.
"Balang araw, Solo, kakailanganin mong mabuhay
mag-isa, makipagsapalaran sa hamon ng buhay kung nais mong manatiling buhay. Sa
loob ng libo-libong taon, ang mga ninuno ng tao ay namuhay ng gaya nito, takot,
nagtatago sa kweba, nagugutom. Walang tigil na takot sa hinaharap. Ang takot na
ito ang humubog sa tao na madama ang hinaharap, ang mangyayari pa lang. Natuto
silang magplano sa hinaharap. Hanggang sa matutunan nilang gamitin ang talino
nila at pahalagahan ang pagpapanatili ng lahi. Ito ang misyon mo, ang tunay na
layon ng iyong pagparito. Ngunit nagbago na ang lahat. Nag-iisa ka lang. Hindi
ako titigil sa pag-iral kung hindi naman kita bubuhayin sa kabila ng
lahat."
"Nagbago? Paano ako mabubuhay ng mag-isa?" ang
tanong ng giniginaw na lalaki. Hawak niya ang kanyang balikat at nakabalot siya
sa makapal na kumot.
"Gaya ng sabi ko, nagbago ang lahat. Ang plano ay
buhayin ka kasama ng iba, hindi na ito matutuloy. Hindi ako maaaring masira o
huminto sa misyong nakaukol sa akin, ganito ang mga Bargaan. Kahit pa ilagay ko
sa panganib ang sarili, pipigilan ng sistema ko ang nais ko na pagtatapos ng
pag-iral ko. Ang tanging paraan sa akin upang makamit ang katapusan ay tuparin
ang layon ko, ang misyon na buhayin ka sa planetang ito.
Hindi ganito ang plano, may mga ibang hawig sa Reca, iba't
ibang sasakyang pangkalawakan na may bitbit na punla. Maaga silang nasira, pinabagsak
at naglaho. Hindi ka na magkakaroon pa ng kasama. Ngunit ang isang Bargaan ay
hindi kumpleto kung ang layon nito ay hindi natupad. Ang misyon ko ay buhayin
ka, wala akong ibang paraan upang magtapos. Nanatili sa asteroid, sa Ledro ng
planetang ito ang Reca sa loob ng ilang libong taon ngunit patuloy na
bumabangon, ginigising ako sa pagkakatulog. Wala akong magawa, ang paraan lang
upang magtapos na ito ay ang tuparin ang layon ko. Nakatala na ito sa aking
isipan, kailangan kang buhayin."
Tumayo sa pagkakahiga ang lalaki, lumabas ito sa kweba.
Ang paligid ay maliwanag gawa ng bilog na buwan at ng maliit na asteroid na
tinawag na Ledro na kapwa nitong umiikot sa kalawakan na parang munting buwan.
Samantala may mga nagbagsakang mga maliliit na bulalakaw sa kalayuan. Tinuro
ito ng lalaki ng may pagkasabik, "Tignan mo, bulalakaw!"
"Marami niyan dito. Ang lambak na kinatatayuan ng
bahay mo ay isang malaking hukay, hukay na gawa ng bumagsak na malaking
bulalakaw ito, libo-libong taon lang ang nakalipas."
"Bulalakaw, ngayon lang ako nakakita." Ang
lalaki ay nasabik sa kakaibang bagay na nasaksihan niya. Bagay na hindi niya
nararanasan sa pagkakakulong sa malungkot na bahay-asul.
Matapos ang ilang oras, pinatahan nila ang kabayong
gumagawa ng ingay at natulog ang lalaki habang ang robot na si Pril ay
nakaluklok sa sulok na may tuldok na puti sa madilim na mukha nito. Walang
kasintahimik ang gabi sa loob ng kweba. Ang tila'y siga ng artipisyal na apoy
at hilik ng lalaki ang natatanging kaluskos ng ingay sa buong kalupaang
nililiwanagan ng bilog na buwan.
VIII
Bumangon ang lalaki na nakahiga ang kalahati ng kanyang katawan
sa sahig ng kweba. Mabilis siyang tumayo at nagpagpag ng damit. Pansin rin
niyang naging maitim sa pagkakasunog ang tatlong metal na bola, at maging ang
maliliit na batong nasa paligid nito. Kita sa bukana ng kweba ang sumisibol na
araw.
Nasa labas si Pril, pinatatahan niya ang kabayo. Nagwawala
kasi ito at tila'y nangangalkal ng lupa.
Nagsalita ang robot, "Kailangan na nating
makaalis." Hawak nito ang kulay maputlang kayumangging kabayo. May mga
iba't ibang kulay na hugis singsing na bilog ang nabubuo sa mukhang itim ng
robot, senyales na marami siyang iniisip.
Sila ay tumungo palayo sa lilim ng kweba. Makalipas ang
dalawang oras, umabot sila sa lugar na may malawak na lambak. Hindi gawa sa
bakas ng nahulog na bulalakaw ang lambak, ito ay napaliligiran ng maliliit at
magkakadikit na burol. Sa kalayuan, kita ang umuusok na bulkan na nasa gawing
kabilang dulo ng lambak. Inikot nila ang lambak at lumapit sila dito sakay ng
kanilang kabayo. Hawak pa rin ng robot ang lubid na umuugnay sa dalawang
kabayo. Hininto ang lalaki ng robot na si Pril sa tamang agwat. Sila ay nasa
ligtas sa init, malayo sa mga gumugulong at umuusok sa init na mga bato.
Bumaba na ang lalaki sa kanyang kabayo, hawak niya ang
tali nito. Alam niyang nagwawala ito paminsan minsan at hindi niya nanaising
makalas ang pagkakahawak niya. Napatingin siya sa naglalaway na kabayo sa
kanyang tabi. Gumagawa ito ng malakas na ingay. Maging siya ay nagtatakang
hindi siya natatakot sa dambuhalang nilalang na ito, di gaya ng batang babaeng
ilusyon na nakita niya't kinatakutan. Hindi rin nawawala ang ala-alang ito sa
kanyang isipan, ang imahe ng isang batang babae na unang nakita niya sa
kasaysayan ng kanyang maiksing buhay. Hindi rin naman takot ang kabayo sa
kanya. Tila ba'y alam na nila na sa buong kalawakan ay natatangi silang dalawa.
Sinusuklayan ng lalaki ang puting buhok nito gamit ang kamay. Hindi siya
interesadong makita ang bulkan na pakay ng paglakbay nila. Siya ay mas naakit
sa ganda ng nilalang na kanyang hinihipo at pinakikiramdaman.
Si Pril naman ay nagmamasid lang at nahihiwagaan sa
pinakikitang kilos ng lalaki. "Aakyat lang ako. Ilang minuto lang, aalamin
ko ang kalagayan ng bulkan at babalikan kita. Huwag kang susunod. Dito ka lang,
manatili ka lang dito." bilin ni Pril. Sumangayon lang ang lalaki, tumalikod
muli at binubulungan ang kabayo nito.
Umakyat ang robot papalayo ng mag-isa. Ang metal na kabayo
ay iniwan niya, nanatili ito sa baba at hindi ito malikot. Sa kabayong metal
nakatali ang kabayo. Nakatahan at hindi na malikot ang kabayo. Siguro'y
nakatulong ang paghaplos sa kanya ng lalaki.
Umuusok ng kulay itim ang bulkan. Naglalabas ito ng mga
batong nagbabaga at gumugulong paibaba.
Higit kalahating oras nawala ang robot. Pagbaba nito,
pabalik, umuusok ang balikat at ulo nito sa init.
"Kakailanganin nating makaalis dito, sa lugar na
ito." wika ng papalapit na robot.
"Sige, alis na tayo." sagot ng lalaking nabagot
sa inip.
"Hindi mo naintindihan Solo, ang ibig kong sabihin ay
kailangan na nating maka-alis sa Ares. Ang anim na buwan ng paghahanda ay
kulang pa. Hindi tayo makakapagtagal ng ilang buwan pang higit pa dito. Ang
lugar natin ay peligroso. Sasabog ang bulkang ito ng sobrang lakas. Kailangan
pang makapagipon ng lakas ang Reca. Kulang ang oras natin upang kayanin ng Reca
na makapagipon ng lakas para sa malayong bituin na ating lilipatan."
"Hindi ba makakasagap ng enerhiya ang Reca sa labas ng planeta? "
"Solo, sa oras na umalis ang Reca, hindi na ito hihinto pa hanggang sa susunod na panahon ng pag-iipon ng lakas. Kung itotodo naman natin ang kapasidad ng Reca, malaking peligro ito dahil posibleng uminit ito at mawasak. "
Pinatakbo nila ng napakabilis ang dalawang kabayo pagawing
pabalik sa kanilang bahay na asul at sa sasakyang tinawag na Reca.
Pagkalagpas sa yungib na hinintuan nila kagabi, sila ay
bumagal. Napansin ng lalaki na tila'y nanghihina ang kabayo niya. "Anong gagawin
natin? Hindi na niya kaya Pril, hirap na siyang lumakad." sabi ng lalaki.
"Kailangan natin siyang pakainin at painumin. Sa Reca
may pagkaing dayami at tubig, kukuha tayo ng lalagyan. Malapit na tayo."
"Nahihirapan na siya, Pril. Kaya mo ba siyang gamutin?"
"Umasa tayo na sapat ang oras natin para maisalba ang
kabayo mo." sagot ng robot.
Sa kalagitnaan ng kanilang paglalakbay, nagpasya ang
dalawa na bumaba, hawakan ang mga kabayo at maglakad na lang.
"Teka, Pril. Anong tawag sa kabayo mo? Bakit hindi ko
alam iyan? Wala akong memorya tungkol dyan. Alam kong damo ang tinutukoy mong
pagkain ng kabayo, kahit pa hindi pa ako nakahawak nito. Alam kong mahaba ito,
magaspang at kulay berde. Ngunit ang kabayong bakal mo, hindi ko alam. Hindi
mapaliwanag ng aking isipan. Wala akong memorya ng bakal na kabayo. Iniiwasan
siya ng kabayo ko, natatakot siya. Bakit kaya? Bakit mapula ang mata ng
kabayong robot? Minsan naman berde ang kulay."
"Hindi ito parte ng tinanim sa iyong memorya, Solo.
Ako lang ang nagkalkula at nagdesisyong ilabas ito mula sa mga datos na dala ng
Reca. Isa itong Xeliogot, mga uri ng robot sa aking panahon na inihahawig sa
mga makalumang hayup, mga orihinal na hayup ng planetang Earth. May iba't ibang
gamit sila at ganito sila nilalagyan ng enerhiya." isinuksok ng robot ang
kamay nito sa bag at hinablot ang lapad at asul na pabilog na tableta. Kinain
ito ng metal na kabayo sa kanyang bibig. Naging berde ang kulay ng mata nito
pagkatapos. "Pula, kapag mahina na ang reserbang enerhiya niya at berde ang
mata kapag masagana siya sa enerhiya."
"Teka Pril, makagagawa ba ng mga halaman ang Reca?
Mga puno kaya? Mas masaya siguro kung pati mga iba pang kahayupan, gumawa tayo
dito sa Ares! Kapag may damuhan sa paligid ng bahay, hindi mo na kailangang mag
panik panaog mula sa itaas ng Reca. Malayang manginginain ang kabayo ko.
Posible ba?" tanong ng lalaki.
"Negatibo. Hindi pwede. Kaya ng Ares buhayin ang mga
iyon, pero sa aking kalkulasyon, hindi kakayanin ng mga halaman at hayup na
mamuhay dito ng ganoon kabilis at ganoon kadali. Maraming dapat isaalang-alang
bago magkatotoo ang hiling mo, ang lupain pa lang ay hindi tugma sa
pangangailangan ng halaman. Sa ganitong klima, mga bulkan na hindi panatag,
hindi mabilis makapagparami ang mga hayup. Ngunit maaari nating baguhin ang
klima gaya ng paulit ulit ko nang binago ang hangin sa planetang ito.
Mahaba-habang panahon at di sapat ang Reca para baguhin ang buong planeta. Ang
mga bakterya na dala ng katawan mo at ng pagkain mo lang ang mananatili dito.
Paglikas natin, kontiminado na ang planetang ito. Hindi ko maibibigay ang
hiling mo ngunit maaari kong baguhin ang klima ng manipis na atmospira ng
planeta. Matagal na proseso bago magiging sapat tirhan ng mga halaman at hayup
ang pagpapalit anyo ng kalupaan. Kulang ang oras natin."
Nakauwi na sila, sa wakas, kita na ang batong tinawag na
kulisap at ang higanteng ala-aninong nakatindig sa di kalayuan, ang sasakyang
Reca.
Itinali ni Pril ang kabayo sa pundasyon ng Reca. Umakyat
ang robot sa metal na hagdan ng toreng itim.
"Umuwi ka na sa bahay at pagbalik ko makakakain ka
na. Lilikha ang Reca ng pagkain at ibababa ko sa bahay." ang sabi ng robot
habang umaakyat ito.
Tinapik ng lalaki ang kanyang kabayo at sumagot ito ng
mahinahon sa kanya. Para bang sumasama sa kanya ang nilalang nang papalayo siya
pababa ng hagdanan. Mukhang nahihirapan itong huminga. May kahabaan ang tali
nito na nahatak sa paglapit nito sa lalaking umaalis palayo ng tore. Niyakap ng
lalaki ang kabayo at kinausap ito. "Wag kang mag-alala, babalik ako
agad."
Bumaba sa hagdang gawa sa bato ang lalaki. Matapos ang
ilang sandali, nakabalik sa asul na bahay ang lalaki, uminom siya sa gripo
gamit ang kamay at naligo siya sa banyo ng may kabilisan.
Nakarinig siya ng ingay sa labas. Kumukulog ng
napakalakas. Mabilis siyang nagpunas ng katawan at nagsuot ng pantalon.
Naglalabas ng kidlat paitaas ang itim na tore ng Reca.
Maging ang madilim na ulap na nabubuo sa ibabaw nito ay kumikidlat rin. Dahil
sa tila'y usok na ulap na inilalabas ng sasakyang tore, kumukulimlim ang
kalangitan. Nasa tapat ng bahay ang lalaki, nakatingala at pinapanood ang
makulog na ulap. Ilang sandali pa at umulan.
Tumakbo siya ng sobrang bilis papalapit sa Reca. Naging
madulas ang hagdang gawa sa bato. Nag-alala siya sa kanyang kabayo. Sumisigaw
siya habang umaakyat, umaasang makikita siya ni Pril sa ibabaw ng tore, doon sa
bilog na modula nito. Natatakpan ng makapal na ulan ang Toreng itim. Saglit
lang at nakalapit na siya sa kanyang kabayo. Inabutan niyang gumilid ang kabayo
sa pinakagilid ng pinagsisilungan upang makainom sa naiipong ulan na umaagos
paloob ng silong. Mukhang may dinarama itong sakit.
Matapos uminom, biglaang humiga ang kabayo. Nanlilisik ang
mga mata nito at naglalaway na. Hanggang sa tuluyang ibinagsak nito ang ulo sa
maputik na sahig. Mabilis na nilapitan ng lalaki ang kabayo at napaluhod siya
sa harap nito. Hindi niya alam ang gagawin, nahihirapan siyang nakikita ang
nilalang na hirap sa kalagayan.
Napasigaw ang basang basang lalaki.
"Pril! Priiil! Kailangan kita. Lumabas ka na!"
Tumayo siya. Sinubukan niyang talunin ang imposibleng
abuting hagdan ngunit hindi niya ito maabot. Sumisigaw siya sa itaas ng itim na
modula. Nakatingala siya't umaasang bubukas ang pinto sa itaas. Kinuha niya ang
lubid ngunit hindi umaabot ang lubid na ipinupukol niya sa dulo ng hagdang
metal.
"Pril! Nasaan ka?!" ang ilang ulit niyang
sinisigaw.
Ilang minuto pa ang hinintay ng lalaki ng humupa na ang
ulan. Napabuntong hininga ang lalaki sa natanaw niya. Napalitan ang kulay abong
kalangitan ng kulay asul! Samantala, bumukas ang bilog na pinto sa itaas at
napansing bumababa ang robot mula dito. May bitbit itong sakong may laman na
damo.
Pagbaba ng robot, binitawan nito ang sako ng damo. Sumindi
ang ilaw na pula sa mukha ng robot na hugis bilog. Napaluhod naman sa harapan
ng kabayo ang lalaki. Niyugyog niya ang dambuhala upang alamin ang kalagayan
nito ngunit hindi ito sumasagot. Tumulo ang luha ng lalaki. Pinipilit niyang
gisingin ang kanyang kabayo ngunit hindi ito sumasagot.
"Aanhin pa ang damo, patay na siya, patay na ang
kabayo. Maililigtas sana natin siya." wika niya. Napaupo ang lalaki,
tinakpan nito ang mata niyang namumula. Huli na ang lahat. Nabalot ng pagkataka
ang robot at hindi nito alam ang gagawin, hindi niya naiintindihan ang
pagdadalamhati ng lalaki. Sumandal ang lalaki sa itim na silindrikong pundasyon
at nakatitig siya sa kawalan. Sa unang pagkakataon, nakaranas siya ng matinding
lungkot. Humagulgol siya sa iyak na parang musmos na bata. Nawala ang kabayong
natutunan niyang mahalin sa loob ng napaka-iksing panahon.
IX
Naranasan ng lalaki ang isa sa mga katotohanan ng buhay--
ang lahat ng may simula ay may katapusan, ang lahat ng may buhay ay may wakas.
Tatlong buwan na ang nakalipas simula nang inilibing ng dalawa ang nilalang na
natatangi. Umuulan nang inilibing nila ang kabayo sa putikan, malayo ng bahagya
sa batong tinawag nilang kulisap.
Lumalakas ng lumalakas ang mga pagyanig ng lupa habang
tumatagal ang panahon. May tampo pa rin ang lalaki sa robot ngunit paunti-unti
na itong nababawasan. Sa umpisa'y parang batang nagmamaktol ito at ayaw kumain.
Nilibing nila ang kabayo sa putikan ng walang tigil na sinisisi ng lalaki ang
robot. Sa una'y sinisisi niya si Pril dahil hindi niya naisip pakainin ito o
painumin matapos siyang ilabas ng sasakyan. Sinisi rin niya ang kulog at ulan
na pinalitaw ni Pril. Marami siyang teorya sa nangyari, marami siyang
tinuturong dahilan. Natakot umano ang kabayo sa ingay ng kulog at minsan ay nalason
naman sa tubig ulan. Pinipilit ng lalaking intindihin ang nangyayari. Wala
namang tigil ang paghingi ng tawad ng robot.
Tatlong buwan na ang nakalipas mula nung mamatay ang
kabayo, ang dalawa ay nanatiling magkasama sa bahay at gumagawa ng iba't ibang
pagkakalibangan. Walang magawa ang lalaki kundi maghintay sa wala. Madalas
siyang tamaan ng inip, kapag wala ang robot na si Pril, gumuguhit siya sa papel
na nakalapag sa mesa. Maraming beses na niyang ginuhit ang kanyang kabayo at
ang itim na Tore. Hindi naman natatapos ang kwentuhan ng dalawa kapag sila ay
magkasama. Napakarami ng kanyang tanong at napaka-iksi ng sagot ng robot. Mahaba
na ang buhok at balbas niya sa mukha. Tumitingin siya sa salamin at nagtataka
habang sinusuyod nito ang buhok. Sinisilip rin niya ang ngipin na
paminsan-minsa'y nagdudulot ng kirot.
Naglalaro sila ng chess, umaga na ngunit maulap at may
kadiliman pa sa labas.
"Saan tayo pupunta? Gusto kong manatili dito. Ito na
ang tahanan ko, Pril. Ayaw ko nang umalis dito. Nagdesisyon na ako. Posible ba,
Pril? Pwede bang wag na tayong umalis?" sabi ng lalaki.
"Wala tayong magagawa. Mamamatay ka dito. Kailangan
nating umalis sa loob ng siyamnapung araw. Kapag nanatili ka dito, hindi
makukumpleto ang lahat, hindi buo ang misyon. May planeta malapit dito, mahina
ang gravity, manipis ang hangin ngunit mababago ng Reca ang hangin nito. Kung
di tayo aalis, hindi kumpleto ang misyon, habang buhay akong magiging
kaluluwang gala. Kailangang makumpleto ko ang misyon."
"Teka, sandali. Tama ba ang narinig ko? Sabi mo sa
akin wala kang buhay. Sabi mo ang robot na gaya mo, ang Bargaan,, ay komplikadong
bagay lang, gawa sa metal, nagsasalitang patay. Kaluluwang gala? Anong ibig
mong sabihin? Hindi ko maintindihan. Sabi mo hindi ka buhay. Nagsinungaling
ka?"
"Hindi, Solo. Totoo ang sinabi ko. Hindi ako buhay.
Pasensya na at huwag ka sanang umasa. Nagsasalita rin ako gaya mo, ngunit gaya
ng Magic8ball na ito, sumasagot ako sa tanong mo ng walang malay." hawak
ni Pril ang itim na bola. "Ngunit may misyon kami na dapat matupad, ang
aming uri ay may layuning dapat matupad. Hindi kami maaaring magtapos ng hindi
natutupad ang layunin o dahilan ng pagkakagawa sa amin. Matapat ang mga uri ko
sa misyong ini-atas sa amin dahil sa ito ang naka-programa sa amin. Kung hindi
namin susundan ang misyon, wala kaming karapatang magwakas, patuloy ang aming
pag-iral. Hindi namin masisira ang sarili, maliban na lang kung kinailangan ito
upang matupad ang misyon. Ang pagkakaroon ng kawakasan ay ang natural na
kalagayan ng kalikasan at ito ang dapat matupad sa amin." may suminding puting
hugis tao na nabuo sa itim na mukha ng robot.
"Para sa akin, isa kang tao. May buhay ka." ang
sabi ng lalaki.
"Ikinalulungkot kong sabihin, Solo, mali ka."
"Ano pa ang silbi ng pagbigay buhay mo sa akin?
Sabihin mo nga sa akin. Nagsasalita ako sa harap ng anino? Niloloko ko ang
sarili ko na may kausap, kahit sa totohanan ay wala talaga akong kausap?"
"Hindi ko rin alam. Ikaw ay mahalagang buhayin. Alam
ng lahat, na ang lahi ng tao ay mapanira. Ang sarili nilang mundo, sariling
tahanan nila ay winasak nila. Hindi nila binigyang halaga ang mga ibang buhay
na kasalo nila sa iisang planeta. Inaabuso rin nila ang kapwa nila. Maka-ilang
ulit silang nagsiraan ng kultura at kabihasnan. Di mabilang ang digmaan, gulo,
pighati na kanilang idinulot sa bawat isa. Sa bawat pagtatalo, nasisira ang
nag-iisang tahanan nila. Walang matinong
dahilan para ibalik ang lahi ng tao. Hindi ko maintindihan kung bakit. Hindi ko
maisip ang halaga na ibalik pa ang lahi ng tao. Ang alam ko lang, ito ang
layunin ko. Ikaw, mag-isa ka man ngunit ikaw ang pag-asa ng lahat ng mga buhay
noong panahon nila. Nag-iisa ka man ngunit mananatili kang simbulo ng paglaban
ng buhay sa kamatayan."
"Hindi ko sila katulad. Hindi ako masamang tao."
sagot ng lalaki. "Isa pa, mag-isa
ko lang. Kung marami man ang tao, hindi ako naniniwalang ang bawat isa sa amin
ay likas na mapanira. Ako ang pag-asang mamamatay mag-isa."
Ibinalik nila ang atensyon sa larong chess. Iginalaw ng
lalaki ang rook palapit sa King na itim. "Checkmate." ika niya.
"Pril, pinapapanalo mo lang ba ako?"
Natawa ang robot at napahawak pa ito sa kanyang baba.
"Hindi kita pinapanalo, Solo. Nanalo ka talaga. Ako
ay nakaprogramang hawig sa katamtamang talino ng isang tao, sa ganitong paraan,
hindi ka mahihirapang makasama ako. Kailangan mo ng kasamang huhubog sa
pagka-tao mo. Ang ibalik ka ay hindi birong pagsubok. Sabihin ko sa iyo ang
totoo, napakarami ng nagbuwis ng buhay at pag-aari maging matagumpay lang ang
misyon na ito. Lumabas ka lamang ng buhay."
"Yun ba ang dahilan kaya ka tumatawa, para maging
madali sa aking makasama ka? Sino ako? Bakit nila gustong buhayin ako?"
"Tama ka, Solo. Kailangan kong kumilos sa paraang
madadalian ang paghubog sa pagkatao mo."
"Bakit ako? Sino ako?"
"Hindi kita masasagot, hindi ko rin alam."
"Ibalik mo ako saan man ako galing."
"Galing ka sa Reca. Hindi pa tama ang oras para
ibalik ka."
"Gusto kong bumalik sa pinagmulan, sa sistemang
bituin na kinalalagyan ng inang planeta, yung Earth."
"Patay na lugar na iyon, Solo. Walang saysay kung
babalik ka man doon dahil walang pinagkaiba ang sistema na yun dito. Isang
disyertong apoy ang planeta na yun, walang lugar na ligtas sa sistema ng
pinagmulan."
"Anong saysay naman ng pagparito ko kung mamamatay
lang akong mag-isa? Sabi mo mahalaga ako. Ano ang halaga nito?"
"Wala akong sagot sa lahat ng tanong mo. Ang pagbuo
sa iyo ang tanging laman ng Reca. Hindi ka rin handa, naaalala mo pa ba,
natakot ka noong makakita ka ng batang tao? Isa pa, hindi buo ang kautusan sa
akin, ganito ang istilo ng mga Quillian na nagsugo sa akin dito. May mga
sekreto na hindi inilalabas agad. Ang alam ko lang kailangan kitang buhayin,
dinesenyo akong maging masunurin, likas akong ganito. Ang makakasagot sa tanong
mo ay hindi ako, silang nagpadala sa akin, silang matagal nang patay."
Lumabas ang lalaki, iniwan niya ang robot. Umupo siya sa
tapat ng asul na bahay ng nakasimangot ang mukha.
X
Walumpu't limang araw na ang nakalipas, nakasanayan na ng
lalaki ang buhay na ang bawat araw ay nauulit. Tuwing umaga lumalabas siya
sakay ang kabayong bakal. Pinagbibilinan lang siya ni Pril tuwing umaalis na
huwag lalapit sa bulkan at umiwas sa aksidente. Pinagaling rin ng robot ang
kumikirot na ngipin ng lalaki. Ang robot ang siyang gumagamot, gumugupit ng
buhok at nagsisilbi sa kanya. May balbas na siya sa ngayon at may katamtamang
haba ng buhok.
Naglalakbay siya sa gawing timog-kanluran. Naisipan niyang
magpahinga ng makakita siya ng ipo-ipo sa kalayuan. Naaliw siyang pagmasdan
ito. Ang buhawi ay may kasamang dalawang maliit na ipo-ipo at nagdudulot ito ng
ingay sa napakatahimik na lugar. Nakahinto siya kasama ang metal na kabayo sa
tabi ng bangin. Kinuha ng lalaki sa kanyang bag ang tinapay at uminom siya ng
baong tubig. Nakatayo sila ng kabayong bakal sa gilid ng isang bangin, sa tabi
ng maliit na yungib. Dahan-dahang nagbabago at napalitan ng kulay pulang ilaw
ang mata ng metal na kabayo. Hudyat ito na kailangan nito ng asul na tableta,
dahil gumagamit na lang ito ng reserbang enerhiya sa kanyang katawan. Ang
natitirang lakas nito ay galing sa araw, hindi ito makakatakbo ng mabilis kung
sakali. Binigyan niya ng dalawang pabilog at lapad na tabletang asul ang
kabayo. Isinubo niya ito at saka tinapik ang panga ng kabayo. Napalitan ng
berdeng ilaw ang mata nito, matapos lulonin ang tableta.
Habang sinusuri at hawak ng lalaki ang bibig ng kabayong
bakal, may umagaw ng kanyang pansin. Tila'y nakita niya si Pril sa may kalayuan
na nakatayo sa ilalim ng bangin. Parang anino ito na nakatayo at pumasok patago
sa gawing pakanan.
Agad na sumakay sa kabayong metal ang lalaki. Mabilis
nitong pinatakbo ang kabayo sa gawing kita ang daang pinasukan ng anino ngunit
bigo siyang makita ito. Tumingin siya sa kalayuan ngunit wala siyang maaninag
na nakatayo roon. Pinalakad pa niya ng bahagya ang kabayo ng pakaliwa ngunit wala
ang hinahanap niya.
Agad siyang umuwi. Pinatakbo niya ng sobrang bilis ang
kabayo kahit pa binilinan na siyang huwag gagawin ito upang makaiwas sa
aksidente. Bumagal sila nung malapit na sila. Sa batong itim na hugis kulisap,
inabutan niyang nakatayo si Pril dito. Lumundag ang robot pababa.
"Napagod ka ba? " tanong ng robot.
"Hindi"
"Magpahinga ka na, kailangan mo yan para matulungan ako bukas. May mamon akong inihanda para sa iyo, karne ng isda at may mansanas pa. Dala ko ang paborito mong dalandan. Halika, pahinga ka muna." ang winika ni Pril ng salubungin ang lalaki.
"Sinusundan mo ba ako?" tanong ng lalaki.
"Bakit?
Hindi. Nandito lang ako sa itaas ng Reca kanina."
sagot ng robot.
May hugis parisukat na puti ang umiikot-ikot sa madilim na
mukha nito. Hawak ng robot ang mga pagkain sa bag.
"Sino pala ang nakita ko sa bangin? Doon?"
tinuro ng lalaki ang gawing kalayuan. Lumingon naman ang robot.
"Uulitin ko lang ang sagot ko. Nandito lang ako.
Nag-mamalik-mata ka lang siguro, Solo. Nangyayari yun."
"Tiyak akong may nakita ako, ikaw. Pumasok sa gawing
pakanan, nung kumilos ako sa gawing kaliwa, hindi ko na siya nakita. Alam kong
ikaw yun."
"Hindi mo na nakita. Nagmalik-mata ka nga siguro.
Imposible ang sinasabi mo. Halika, sa bahay natin pag-usapan iyan."
Umuwi sila sa asul na bahay. Matapos kumain ng lalaki,
silang dalawa ay nakatayo sa kusina at nag-uusap. Nais ng lalaki na isama ang
robot sa lugar kung saan niya nakita ang anino ngunit hindi pumayag ang robot.
Abala ito sa paglikas nila ng planeta sa mga susunod na araw.
Nagsalita ang robot. "Doble sa pangangalap ng mineral
ang Reca, delikadong iwanan ito ng hindi ko inoobserbahan mula sa labas. Hindi
ko ito pwedeng iwanan. Kailangan kasi nating lumikas agad bago lumala ang
sitwasyon. Kulang pa sa mineral ang Reca, ito ang tutunawin at gagamiting
enerhiya natin sa loob ng maraming taon. Kapag napabilis ang paghukay nito,
mag-iinit at posibleng masira ito. Nandito lang ako, hindi pwedeng iwan ang
Reca at hindi kita masasamahan para obserbahan ang tinutukoy mo."
Hating-gabi na. Umaambon sa labas ng bahay. Nakasarado ang
mga pinto kaya't di rinig ang ingay ng ulan. Nakadamit pantulog na ang lalaki,
ngunit hindi pa niya balak matulog. Tumatakbo sa kanyang isipan ang misteryong
nasaksihan niya. Umiinom siya ng mainit na tsokolate.
Nasa ika-sampung laban na sila ng larong chess. Mahigpit
ang kanilang labanan. Parehas silang kulang ng mga piyesang Reyna at ang mga
opisyales ay halos ubos na.
"Ikaw na." ang sabi ng lalaki.
"Sandali, nag-iisip pa ako." hawak ng robot ang
ulo nito. May mga kulay ubeng liwanag ang sumindi at humugis pabilog ang nabuo
sa mukha nito. Ito ang senyales na hirap siya sa laban. Natatawa ang lalaki
habang hinihimas nito ang braso niyang giniginaw.
Sa hindi inaasahang pangyayari, biglang tumayo ang robot.
Bumagsak at nagkalat ang mga piyesa ng chess sa sahig. Ang buong mukha nito'y
lumiwanag ng sagad, napakaliwanag ng putting liwanag na di pa nangyari
kailanman. Kinalibutan ang lalaki. Siya'y napaatras at tumayo sa inuupuan.
"Anong nangyayari sa iyo Pril?" sigaw ng lalaki.
"Huwag kang maingay, Solo! May kasama tayo! Dapa!
Magtago ka sa sulok ngayon na!" ang sagot ng robot. Nanatili siyang
nakatindig. "Sa sulok. Ngayon na!"
Mabilis na dumapa at gumapang sa sulok, sa tabi ng bintana
ang lalaki. Hawak niya ang kanyang ulo habang nakasiksik siya sa sulok.
Nakaharap sa bintanang salamin ang robot.
"Kahit anong mangyari, huwag kang gagawa ng ano mang
ingay." ang sabi ng robot sa napakahinang tono.
Ginagalugad nito ang madilim na paligid sa labas ng bahay.
Bilog ang buwan ngunit napakadilim sa gilid ng lambak.
May pa-isa isang lumilitaw na mga robot na hawig kay Pril
sa ibabaw ng lambak, sa harap ng tore ng Reca. May maliwanag na sinag rin ang
lumalabas sa bawat mukha ng mga ito na parang sulong pandagat. Ang mga mukha
nila ay buo ring lumiwanag at ang lahat ng liwanag ay nakatutok sa asul na
bahay.
Nakikita naman ng lalaki ang nangyayari. Ang mga hugis ng
mga robot sa itaas ng lambak ay kitang umaaninag sa frame ng salamin ng mga
larawan na nakapaskil sa pader ng bahay. Ang mga dayong robot na may agwat na
malayo sa isa't isa ay bumibilang ng sampu.
"Wag kang aalis dyan. Nandito sila para sirain ang
Reca, Solo. Nag-uusap kami ng kasalukuyan habang kinakausap kita. Naguusap kami
sa isipan. Ang bawat isa sa kanila ay nagtataka sa pagparito ko. Hindi nila
alam ang tungkol sa iyo. Gusto nilang malaman ang pakay ko dito. Gusto nilang
makalapit. Gusto nilang siyasatin ang pakay ko dito. Gusto nilang sirain ang punla. Pinapasok nila
ang sistema ko at hindi ko sila pinahihintulutan. Sila ay mga lipon ng mga
robot na isinugo para lupilin ang mga insektong metal na umuubos sa mga
organiko. Hindi nila magugustuhan ang misyon natin. Hindi nila dapat malaman
ang misyon natin. Pumapasok sila sa isipan ko, Solo. Hinihikayat nila akong
isuko ang memorya ko. Nanghihinala na ang iba sa kanila. Sa ngayon hindi pa nila natutunton sa isip ko
na nandito ka. Hindi ito magtatagal at hindi ko na sila mapipigilan, sakaling
madaig ng lakas nila ang pagharang ko.
Sila ay mga Bargaan na tatlong henerasyong mas angat sa
akin. Sinuyod nila ang lahat ng nasasakupan, sila na lang at ako ang natitirang
robot na nasa maayos na kalagayan. Mas angat sila sa teknolohiya sa akin ngunit
mga antiko na rin, sobrang luma na rin sa tagal. Wala silang gumaganang
sasakyan. Hindi sila nakukumpuni sa mga sirang piyesa nila. Lumunsad sila
galing sa sistemang bituin kung saan ako galing. Dumating sila dito ng nauna pa
sa akin, ngunit sa malayo sila bumagsak. Mas maliliksi sila at mas mautak. Kumukuha
lamang sila ng lakas sa araw ngunit sapat na ito dahil sa tagal na nilang
nandito. Aagawin nila ang Reca kung sakali. Papatayin ka nila kapag nakita ka
nila. Gusto nilang malaman ang layon ko dito. Kapag natagpuan nila ito,
papatayin ka nila. Kailangan ko silang makumbinseng lumapit dito. Tama, yun
lang ang paraan."
"Nasisiraan ka na ba? Lalapit? Bakit mo sila
palalapitin?" ang malakas na pabulong ng lalaki. Hindi siya makatingin sa
robot ng hindi nakatakip ang kamay dahil sa nakasisilaw na liwanag na galing sa
mukha nito.
"Sila ay mga Bargaan na umiikot sa buong Galaxy,
naghahanap ng mga metal na kulisap na pumapatay sa mga organiko. Sila ang
grupong Nemesis, pinagsisilbihan nila ang mga sinaunang Penttos. Gumagala sila
sa buong kalawakan. Inuubos nila ang mga metal na insektong ito na nakakalat sa
mga bituin. Ang kulisap mo ay hindi mga batong nagkataon lang, ito ay kanilang
itinayo, hinugisan nila ito at ipinatong. Katibayan nila ito na malinis ang
paligid sa mga pumapatay na peste. Matagal na silang nandito sa Ares,
labingtatlong libong taon na noong sila'y napadpad at bumagsak dito. Nauna sila
ng sandali sa pagdapo ng sasakyan ko sa buwan na asteroid, ang Ledro. Doon sila
sa malayong dako namalagi, nakatago sa bangin. Ito marahil ang tinukoy mo sa
akin. Swerte na ikaw ang nakapansin sa kanila at hindi ikaw ang unang nakita ng
mga Nemesis. Naalerto sila noong nagbago ang atmospira at umulan. Ito ang mga impormasyon
na sadyang pinaalam nila sa akin.
Sa loob ng maraming taon at sa bawat dako ng kalawakan,
nakita nila ang ibang sasakyan na nagtataglay punla tulad ng Reca at winasak
nila ang mga ito! Gamit nila ang sasakyang Jint, dinala sila rito, sa Ares.
Nakaprograma patungo dito ang Jint at hindi nila ito mapalitan, wala silang
kontrol sa sistema ng Jint. Hindi sila dadalhin dito ng sasakyang ito kung
hindi ito nagdadala ng sonda. Hanapin mo ang nasirang sasakyang ito, Solo.
Posibleng narito ang ibang punla ng ibang tao, ito ang kailangan mo. Hanapin mo
ito at matutupad ang misyon. Wala na tayong oras, naghihinala na sila! Makinig
kang mabuti. Kung sakaling makarating ka sa sasakyan nilang bumagsak, lumapit
ka dito. Ilapat mo ang kamay mo sa itim na bilog na nakaukit sa pintuan nito
para bumukas. Hindi sila makapasok sa pinaka-sentro nito dahil hindi sila tao
gaya mo at hindi tanggap ang uri nila ng sasakyan na nakaprogramang tao at
bantay na bargaan lang ang makakapasok. Sa loob, hanapin mo ang pentagonong
kristal. Kung hindi pa nila ito nawawasak, hanapin mo ito. Ilapat mo naman ang
kamay mo sa bakas ng kamay, bubukas ang pinto nito. Hanapin mo ang hugis
parihabang itim. Ito ang punla. Bumalik ka sa Reca, gumamit ka ng lubid.
Umakyat ka sa hagdan na inaakyatan ko. Sa ibabaw ng Reca, tuturuan ka ng diwa
ng Reca sa mga kailangan mong gawin. Kaya mo ito Solo."
"Bakit? Saan ka pupunta? Hindi mo ako
sasamahan?"
"Oras na ng pagbangon mo Solo. Magtiwala ka sa
kakayahan mo. Sila ay lalapit na, wala na tayong oras, sisirain nila ang lahat
ng makita nila.
Sa aking senyas, papatayin ng Reca ang ilaw. Lalamig ang
buong bahay para hindi nila makita ang init ng katawan mo. Pagpatay ng ilaw,
mabilis kang gumapang papunta sa loob ng cabinet ng kwarto at buksan mo ang
sekretong pinto pailalim dito. Magtago ka roon. Susubukan ko silang pigilan."
Biglang tumakbo isa-isa ang mga sampung itim na robot.
Bumulusok sa bilis ang mga Nemesis palusob ng bahay. Isa-isang namatay ang sulo
sa mga mukha nila. Mas mabilis sila kay Pril kung tumakbo. Biglang namatay
naman ang ilaw ng bahay. Mabilis na gumapang ang lalaki papasok sa loob ng
kwarto at binuksan ang kabinet. Kinakapa nito ang bukasan ng pinto pailalim. Nagulat
siya sa pintong bakal na hindi pa niya nakita dati. Pumasok siya sa metal na
pinto at kinandado ito.
Tumalon papasok sa salaming bintana ang isa sa mga robot.
Binasag naman ng isa ang pinto ng pumasok ito. Dalawa naman ang pumasok sa
pader ng wasakin nila ito. Nakapalibot ang sampu sa robot na si Pril. Sila ay
mas mataas sa kanya. Para bang kinakausap siya ng mga ito. Nakaturo ang mga kamay nila kay Pril. Nanghina
si Pril at napaluhod ito sa kanyang tuhod.
Hawak ang Magic8ball sa kanyang dibdib, pinisil ni Pril
ang tatsulok na salamin nito at pinindot. Nabasag at umilaw ng pulang ilaw ang
tatsulok. Nagbuga ng napakalakas na alon na kulay bughaw ang bolang itim. Ang
lahat ay nangisay at nagbagsakan sa sahig, kasama si Pril.
Madilim ang bahay, nagkalat ang basag na salamin. Ang
liwanag na galing sa buwan ang nagiisang liwanag sa loob ng bahay.
Matapos marinig ng lalaki ang pagbagsak ng mga robot mula
sa hukay na pinagtataguan niya, siya ay lumabas agad. Napakadilim sa kwarto.
Kinapa niya ang flashlight at binukasan ito. Dahan dahan siyang lumabas palabas
ng kwarto. Nakita niyang nakahilata sa sahig ng munting bahay ang mga
mahahaba't naglalakihang mga robot na kulay itim. Pansin niya ang malaking
butas sa pader, basag na bintana at pinto. Si Pril ay nadadaganan ng isa sa mga
robot.
"Pril!!!" sigaw ng lalaki. "Wag mo akong
iwan Pril! Hindi ko alam ang gagawin ko. Hindi ko alam. Bumangon ka."
Sinubukan niyang gisingin ang robot ngunit hindi ito
sumasagot. Hindi rin niya ito mabuhat gawa ng pagkakadagan sa kanya ng isa sa
mga dambuhalang robot.
Hinawakan niya ang bakas ng basag sa mukha ng kaibigan
niyang robot. "Magpahinga ka na kaibigan. Magpahinga ka." sinabi ito
ng lalaki sa kanyang kaibigang dahil ito ang naaalala niyang madalas sabihin sa
kanya tuwing bago siya matulog sa gabi.
XI
Umaga na at nanatiling nakaupo sa upuan ang lalaki.
Nakaupo sa harap ng lamesa ang metal na katawan ni Pril at hindi kumikilos.
Nakayuko ang ulo nito't nakabagsak naman ang mga kamay. Ang lalaki naman ay
nasa kabilang upuan. Nababalot ng takot at poot ang kanyang isipan. Umiiyak
siya't nagmamakaawa sa kaharap na bumangon na dahil hindi na niya alam ang
gagawin. Hindi niya alam kung paano siya mabubuhay ng wala si Pril. Siya na
lamang, mag-isa na lang siyang natitirang nilalang na kumikilos, humihinga sa
isang disyertong planeta. Alam niya base sa karanasan na ilang oras pa'y
gugutumin na siya at walang lugar saan man ang may pagkukunan ng pagkain. Sa
loob ng matagal na panahon, ngayon lang siya nakaranas ng pighati at matinding
lungkot sa pag-iisa. Iniisip niya ang unang gabing nakilala niya ang robot.
Ilang buwang lang itong nakalipas ngunit parang kay tagal na sa kanyang isipan.
Alam niya ang pakiramdam ng mag-isa. Walang pagbabago, ang robot na si Pril ay
patay na at hindi bumubukas ang sulo sa kanyang mukha. Malungkot ang mukha ng
lalaki, walang patid na nakatitig lang sa kaibigang robot.
Iniisip na lang niya’t binabalikan ang bilin ng robot na
si Pril. Nagsuot siya ng itim na damit at lumabas ng bahay. Umakyat siya sa
hagdang bato na kanilang ginawa. Sumakay siya sa kabayong robot at naglakbay
patungo sa lambak kung saan niya nakita ang anino ng isa sa mga tinaguriang
Nemesis. Siya'y nagpatuloy sa paglalakbay sakay ng kabayong walang pagod. Bumaba
siya sa ibaba ng bangin. Kinapa niya ang bulsa ng kanyang damit. May apat na
tabletang asul na lamang sa kanyang bulsa ng kanya itong suriin. Ito ang
kailangan niya para makabalik sa Reca. Nagpapahiwatig na rin ang kabayo na
nagkukulang na ng enerhiya at nangangailagang kargahan ng tabletang ito.
Sa bangin, napansin niya ang mapulang lupa na may bakas ng
paa ng mga Nemesis. Sinundan niya ito. Sa hindi pa kalayuan may dumaan na
napakalakas na hangin, siya ay bumaba muna at humawak na lang sa tali ng
kabayo. Tinakpan niya ng balabal ang kanyang mukha. Napansin niya sa paibaba ng
dalusdos ang isang itim na nakasadsad sa batuhan, isang sasakyang kahawig ng
Reca. Napakarami na ng alikabok nito at halos namumula na gawa ng lupang mapula
ng Ares. Wala itong silindrikong pundasyon, nakasadsad lamang ito sa lupa at
nakabaon ang halos kalahating bahagi nito sa lupa. Ito ang sasakyang Jint na
tinukoy sa kanya ni Pril. Malaki ito ng bahagya sa Reca. Mas matulis din ang
mga sulok ng palipit na hugis nito.
Agad na hinanap ng lalaki ang bilog na lagusan papasok sa itim na sasakyan. Pumasok siya sa lilim na gawa sa pagkakasadsad ng sasakyan. Nakabaon na sa lupa ang kalahati ng bilog na pinto. Pansin niyang bakas ang mga kamot ng mga Nemesis sa pintuan sa pagpilit nilang makapasok dito. Inilapat niya ang palad niya sa bakas ng palad na nakita niya sa kanang bahagi ng pinto. Hindi ito bumukas ngunit may umugong na tunog na nagmula sa itaas ng dalusdos kung nasaan ang dulo ng sasakyan. Lumabas siya sa lilim at umakyat siya sa mabatong dalusdos. Wala pa ring tigil ang malakas na hangin. Natagpuan niya ang bukas na pinto ng sasakyan sa kabilang dulo, sa ibabaw at pinapasukan na ito ng alikabok. Sumilip siya sa loob ngunit wala siyang makita.
"Hoy! " sigaw ng lalaki. "Wala bang sasagot?” Nag-aalangan siyang sumigaw kahit pa alam niyang walang sinoman ang nasa loob.
Sumilip siya sa madilim na sasakyan at wala siyang naaaninag ano man. Bumababa siya ng dahan-dahan ngunit agad siyang nadulas at gumulong paibaba ng sasakyan. Nang maumpog siya sa dulo, biglang bumukas ang mga ilaw sa loob. May lumitaw sa pakurbang salaming dingding ng sasakyan, lumiwanag ng kulay puti at may isang imahe ng naka-pulang babaeng tao na may mahabang buhok ang biglang lumitaw.
"Huwag kang matakot Solo, ako si Sliin. Alam kong binanggit ako sa iyo ni Pril. Tutulungan kita."
"Sliin? Sliin ng Reca? " Namangha at napatitig
ang lalaki sa kausap niya.
"Ako nga! Ako ang diwa ng Reca. Makinig ka. May sasabihin akong mahalaga sa iyo."
"Nakikita mo ba ako? Buhay ka ba?" tanong ng lalaking sabik malaman ang kalikasan ng kanyang kausap. "Paano ka nakarating dito?"
"Wala na tayong oras. Makinig ka." Napahinto ang diwa na si Sliin dahil napalingon sa kanyang kanan ang lalaki. "Sino siya? " Natakot ang lalaki’t umatras palayo. May imahe naman ng mukha ng lalaking matanda sa kabilang panig ng dingding.
"Siya si Pylis ang diwa ng Jint. Isasama natin siya. Makinig ka, ikaw ang mahalaga. Wala na tayong oras. Kailangan mong makabalik sa Reca, dalhin mo ang mga punla sa Reca." Tinuro ni Sliin ang gawing kaliwa kung nasaan ang isang pahabang pentagonong kristal na kulay asul, may mga nakasuksok ditong mga pahabang itim na bagay.
"Hugutin mo ang mga yan, ang bawat isa ay isilid mo sa itim na bag." sabi ni Sliin.
Umakyat paitaas ang lalaki, hawak ang riles sa gilid ng sasakyan.
"Bilis." Ang pagmamadali ni Sliin.
"Bakit ba? Bakit kailangan magmadali? Paano kayo makakasama sa akin?"
Ginawa na lang ng lalaki ang utos ni Sliin, kinuha niya ang mga punla at inilagay sa bag.
Biglang lumaki ang mukha ng diwa na si Pylis sa dingding ng sasakyan at nagsalita ito. "Wala ka nang oras. Babalik si Pril sa sasakyan at kapag natagpuan ka niya, papatayin ka nito. Sisirain niya pati kami."
"Pril?" laking gulat ng lalaki.
"Hindi si Pril ito na iyong kilala, Solo." Sabi ni Sliin. "Siya ay bantay ng Jint, mas angat sa teknolohiya ni Pril ng Reca. Binuo ang Jint, limang taon na ang nakalipas noong ilunsad ang Reca. Isa siyang buwang na robot, gumagala sa buong planeta at minsa’y bumabalik sa sasakyang ito, mahirap siyang hagilapin maging ang Nemesis ay hindi siya makita. Nasira ang sistema niya nang bumagsak at masira ang Jint. Ito ang dahilan kung bakit inatake ng Nemesis si Pril sa asul na bahay. Sa umpisa’y napagkamalang siya ito. Bilisan mo."
"Si Pril, maka-ilang ulit na niyang naikot ang planetang ito.” Ang sabi ng matandang si Pylis.
"Umaasa lang siya sa sinag ng araw para mabuhay.
Nauna pa kaming dumating dito kahit pa nauna kayong umalis sa pinagmulan. "
"Paano kayo? Maiiwan kayo dito? Paano kayo makakasama?" tanong ng lalaki.
"Huwag kang mag-alala, magkikita tayo sa Reca, Solo." sagot ni Sliin.
Hindi man naiintindihan ng lalaki ang nangyayari, mabilis siyang umakyat sa butas na lagusan niya kahit pa napakabigat ng dala niya sa kanyang likuran. Nahihirapan na nga siya sa bigat, wala pang tigil ang pagpasok ng alikabok sa sasakyan. Bitbit niya ang dalawampu’t tatlong itim na punla sa kanyang likuran. Napakalakas ng hanging may bitbit na alikabok sa labas. Hinanap niya agad ang kanyang metal na kabayo at inilagay sa likuran ang itim na bag. Binigyan niya ng asul na tableta ito, sumakay siya at pinalakad palayo sa sasakyan. Itinali niya ang bag sa kanyang bewang. Tinakip niya ang balabal sa kanyang mukha.
Nang lumingon siya pabalik, may nakita siyang nakatindig sa likuran, isang robot.
"Pril?" Sabi ng lalaki sa sarili.
Biglang umilaw ng kulay pula ang mukha nito at parang lumalapit sa kanya. May hawak itong patalim sa kamay kaya’t natakot ang lalaki at pinatakbo palayo ang kabayo.
Nakakapit ng mabuti ang kamay ng lalaki sa kabayo habang tumatakbo ito ng matulin. Lumilingon siya pabalik sa pinanggalingan upang malaman kung sumusunod pa rin ang robot.
Matapos ang ilang oras, kita pa rin niya sa malayo ang robot na tumatakbo palapit sa kanya, hanggang maiwan niya ito.
Umabot siya sa bato na hugis kulisap at ipinahinga ang robot na kabayo sa ibaba ng Reca.
"Paalam kaibigan" ang sabi ng lalaki sa robot na kabayo. Humarap siya sa gawing ibaba, sa asul na bahay. Tumulo ang luha niya at nagpaalam sa kaibigang si Pril sa kanyang isip. Dinampot niya ang mga lubid na nakabagsak sa maputik na sahig. Kinuha niya ang dulo at ilang ulit itong ibinato sa hagdan ng Reca.
Pagkakapit ng lubid sa metal na riles ng hagdan, inakyat
na niya ito. Umakyat siya ng dahan dahan sa hagdan ng Reca. Hirap siya gawa ng
mabigat na bitbit niya sa kanyang likuran. Hirap siyang mabuhat ang kanyang
katawan. Habang siya ay nasa ibabaw, nakikita niya ang papalapit na robot na
tumatakbo. Siya ay napakalayo pa ngunit bumubulusok at napakabilis. Minadali
niya ang pag-akyat kahit pa nananakit na ng todo ang kanyang mga kamay at
likuran. Pagdating niya sa ibabaw, inilapat niya ang kanyang palad at bumukas
ang pinto. Pumasok siya rito ng hinihingal. Nilapag niya ang bitbit sa sahig ng
Reca. Sumara ang pintuan at lumiwanag ang paligid. Doon, ang pakurbang dingding
ng Reca ay sumindi. Nakikita ang paligid na mabundok at maraming puno. Sinubukang
hawakan ng lalaki ang dingding na salamin ngunit hindi siya nakakapasok sa
napakagandang tanawin.
"Nasaan ako?" tanong ng lalaki.
"Ikaw ay nasa loob ng Reca." Sagot ni Sliin na nasa kanyang likuran. Tumalikod siya at nakita ang babaeng si Sliin na nakaputing damit sa salamin ng pakurbang dingding ng Reca. Ang paligid ni Sliin ay napalilibutan ng kulay berdeng tanawin, mga halaman at kabundukan. Mula sa mga puno naglabasan ang mga nagtatagong mga tao. Sila ay nakaputi ngunit may iba’t ibang itsura.
"Sila ay mga diwa ng iba’t ibang mga sasakyan. Ang Pril ng Jint ang kumolekta sa kanila. Isa siyang dakilang Bargaan, niligtas niya ang mga punla at mga diwa sa iba’t ibang dako ng kalawakan. Sinisira ang mga sasakyan ng mga nagnanais wasakin ang layunin nito, hanggang sa siya na lamang, ang Jint at ang Reca ang natira. Niligtas niya ang mga diwa ng mga wasak na sasakyan, kinuha niya at inipon ang mga punla sa Jint. Hindi natin alam ito, nalaman ko lang ito kahapon. Ang Pril ng Jint rin ang nagligtas sa mga Nemesis na nasiraan ng mga sasakyan. Libong taon na ang nakaraan nang madiskubre niya ang mga naiwang Nemesis sa isang sirang sasakyan. Sa bandang huli, bumagsak ang kanyang sasakyan dito sa Ares, kasama ang sampu at dito siya nabaliw. Hindi maibabalik ng Jint ang buhay ng mga punla, at hindi ito kinaya ng robot. Nasira ang siyamnapu’t pursyento ng sistema ng Jint. Hindi niya ninais na masira ang misyon na milyong taon niyang inalagaan. Ang Reca na lamang ang natitirang sasakyang gumagana pa."
"Pril?"
"Siguro ay lito ka nga, Solo. Ang nakilala mong Pril na natutunan mong mahalin ay ang Pril #5. Ang tinutukoy ko ay si Pril #41 ng sasakyang Jint. Iisa lang ang kanilang programa at layunin, protektahan ang punla na kanilang dala. Lahat sila ay inilunsad na hindi nalalamang may kaparehas sila sa misyon, ang buhayin ang lahi ng tao. Ang Reca ang unang sasakyang inilunsad patungo sa malayong sistemang bituin. Nakatakdang pagsama-samahin ang mga sasakyang ito sa planetang Ares, ngunit hindi na ito nasunod, nasira na ang plano. Dadalhin kita, kasama ng ibang punla sa ibang lugar, malayo dito."
"Paano ako nakarating dito? Sliin, saan ako galing?"
"Ikaw ay mula sa instruksyon ng pagbuo ng embryo ng dalawang mag-asawa na malapit sa isang Quillian, narinig mo na siya, si Yuki Alrasing. Hindi alam ni Pril ito, sa akin lang ito ipinaalam ngunit ito ang katotohanan."
Biglang nahilo at hindi makahinga ang lalaki.
"Anong nangyayari sa akin? " Tanong niya.
"Patutulugin kita. Ilalagay ko ang katawan mo sa ligtas na kalagayan. Gigising ka na lang kapag nakarating na tayo sa patutunguhan. Hindi na tayo maaaring magtagal sa planetang ito. Sa ngayon, kailangan ng Reca ng Bargaan. Nakaisip ako ng paraan."
"Sandali." ang huling iwinika ng lalaki.
Nanghihina at hindi na makakilos ang lalaki. Ang lahat ng nakaputing diwa sa dingding ay nakatingin sa lalaki at nagtataka sila. Ang sabi ng isang babae sa kausap, "Totoo, nabuhay nga ang isa. Nabuhay siya." Ngumiti naman ang lalaking maitim sa kausap. Nakatingin lang sa kanila ang lalaki sa sahig dahil hindi siya makakilos at paunti unti na siyang nawawalan ng malay.
Samantala, ang tumatakbong Robot ay nakaabot na sa Reca. Yumayanig ang lupa gawa ng nagbabadyang bulkan na papaputok na. Gamit ang kanyang patalim, pinugutan niya ng ulo ang Robot na Kabayo ng napakabilis. Nilundag niya ang hagdan at mabilis itong umaakyat. Paakyat na siya at malapit na sa pinto nang may umagaw ng kanyang pansin. Kumikinang ang isang liwanag na nanggagaling sa loob ng bahay na asul. Pulang pula ang madilim na mukha ng robot. Bumaba ang Robot sa hagdan at lumundag ito paibaba. Bumaba siya sa hagdang bato patungong asul na bahay. Malikot ang ulo nitong tumitingin sa bawat dako. Nagtataka siya sa bahay na nakatayo. Nang siya’y makarating, nakita niya sa paligid ang mga Nemesis na nakahilata sa sahig at si Pril na nakaluklok sa upuan sa tabi ng mesa. Lumapit ang robot dito sa pagkamangha sapagkat sila ay magkawangis. Para bang nakatingin siya sa isang salamin. Tinitigan niya ito, inangat, at hinawakan sa ulo. Biglang hinawakan ng nakaupo ang kamay nito. Nanginig ang robot na nakatayo at napalitan ng puting kulay ang pulang liwanag sa mukha nito.
Tinignan niya ang kanyang mga kamay. Sinilip niya ang Reca sa kalayuan at ito ay lumiliwanag sa gilid at gumagawa ng malakas na ingay. Agad niyang dinampot ang imahe ng babaeng nakapiring at ang music box. Tumakbo siya palapit sa Reca. Umakyat siya dito gamit ang isang kamay.
Nabuhay muli si Pril nang sumanib siya sa masamang robot.
Kahit pa hirap siya, inakyat niya ang hagdan ng mabilis. Pumasok siya sa loob
ng Reca at inilapag ang kanyang dala. Napansin niya ang lalaki na nakahiga, binuhat
niya ang taong walang malay. Inilapag siya sa isang higaang punong puno ng
bilog na metal na may iba’t ibang laki at ang mga ito’y nagsikilos, bumalot ang
mga ito sa katawan niya. Tila’y nilamon siya palubog ng mga lupon ng maliliit
na robot.
Pagmulat ng lalaki ng kanyang mata, siya’y nakahiga sa loob ng isang kwarto. Lumabas siya at sinalubong siya ng isang matandang lalaking may balbas.
"Sino ka?" ang unang tanong ng lalaki. "Nasaan si Sliin?"
"Ako si Victor. Hinintay namin ang iyong pagbalik."
"Nasaan ako?"
"Ikaw ay nasa Earth. Isang malaking karangalan sa akin na ako ang sasalubong sa iyo. Naniniwala kaming sa iyo ito." Iniabot ng matandang lalaki ang music box sa kamay ng lalaki.
"Hindi ko. Nasaan ako? Paano? Saan galing ito?"
"Sa Reca. Sa Ares.
Kami ang kaapu-apuhan ng mga punla na dala ng Reca,
limandaang taon na ang nakalipas. Pinangako namin kay Pril na sa tamang oras,
ikaw ay ilalabas namin sa Reca, aalagaan at bibigyan ng masaganang buhay.
Matagal na panahon na noong mamatay si Pril, nagtapos na ang kanyang misyon.
Pinaliwanag niya na pag-bangon mo, hindi mo mararamdaman na nagdaan ang napakahabang panahon. Hindi man siya nakapag-paalam sa iyo, nais niyang ipaabot sa iyo ang balita na
nagkamali siya. Nais niyang ipaalam sa iyo ang lahat ng mga nangyari habang
ikaw ay tulog sa tagal ng panahon, ang lahat ng ito ay para sa iyo at sa kinabukasan ng planetang ito. Nag-iwan siya ng mga aklat, mga huling sekreto na inilabas ng diwa ng Reca, mga kaalaman na may kinalaman sa nakaraan ng planetang ito. Marami ang inakala niyang mali. Bumuti na
muli ang kalagayan ng planetang ito, matapos ang daan-daang libong taong
naglakbay ang Reca sa kalawakan. Nawala ang nakapipinsalang klima nito at naglaho na rin ang lahat ng nakamamatay na radyaktibo sa hangin. Muling nabuhay ang planeta sa tagal ng pagbalik ng punla dito. Dumating dito ang Reca ng nagyeyelo ang
disyertong planeta. Binago ni Pril ang klima ng planeta at mula sa mga punla,
binuhay ni Pril ang aming mga ninuno. Mula rin dito, binuhay namin ng dahan
dahan ang planeta, may mga iba’t ibang halaman na at hayup sa paligid. Sa
umpisa’y nahihirapan mabuhay ang lahat ngunit paunti-unti namin itong
natutunan. Tinutulungan kami ng babaeng nasa salamin, si Sliin. Kasama namin
siya sa loob ng tatlong daang taon. Ngayon, ang aming mga gabay ay wala na,
ikaw na lang ang natitira sa kanila, ikaw na lang."
Hindi na nakapagsalita si Solo. Nananakit ng bahagya ang
katawan niya at tinulungan siya ni Victor na tumayo. Lumabas si Solo sa bahay
at sinalubong siya ng mga tao. May mga iba’t ibang bahay na kulay puti,
magkakadikit ang mga ito, mga higanteng kabute at mga puno. Sa labas, may mga taong may bitbit na
bulaklak sa paligid ang sumalubong sa kanya. Ang lalaki ay hindi na muli mag-iisa.
Agosto 16, 2014-Nobyembre 8, 2014
Mga Maikling Kwento © E.L. Minell